Meydanê Teyara ya Moskova de bomba peqaye

0
267

Peqayîşê bomba meydanê teyara yê paytextê Rûsya Moskova Domodedowo de xeberan ra gore roja 25.01.2011 de tewr tay 34 kesî amey kiştene, dorê 150 kesî kî bîy dirbetinî. Enformasyonanê rojnameyanê Rûsya ra gore bomba bi vîda û parçeyê asinî ra pirr bîye ke zerarê xo zêde bibo.

Heta nika qet rêxistina terorî mesulîyetê hêrişî nêgirewt xo ser. Meydanê teyara de seferê teberî yeno viraştene, naye ra gore mabênê merdeyan de turîstî tay ê, heta nika yeno zanayene ke nînan ra di-hîrê hemwelatîyê Yewîya Ewropa yê. No hêrişê întîharî de ju (yew) merdimî (mordemî) xo bi bombaya 7 kîloyan TNT eşt zereyê miletî. Ajansê Înterfaxî ra gore meyîtê terorîstî ame dîyene, vatenan ra gore şîyo ro kesêde ereb. Rojnameyanê urisan texmîn kenê ke hêrişkar bi îhtîmalêde girs mintiqaya Kafkasî ra yo.

Serranê peyênan de Moskova de xeylê hêrişê bombayan estbîy. Serra 2009 de trenê werteyê Moskova û St. Petersburgî de ju (yew) bombe 30 kesî kiştî. Aşma adar a 2010 de kî metroyê Moskova de bi bomba ra 40 kesî amey kiştene.