Dêrsim de, meydanê Seyîd Rizayî de, adirê newroze ame wekerdene. Merasîmê newroze de bi hezaran kesî amey têlewe.

Kombîyayîş de namzeda sermîyanîya beledîyaya Dîyarbekirî ya BDP Gultan Kişanak, hemsereka pêroyî ya HDP Sebahat Tuncel, sereka beledîyaya Dêrsimî Edîbe Şahîn, serekê beledîyaya Pêrtage Kenan Çetîn, serekê beledîyaya Xozatî Cevdet Konak, namzedê hemserekîya beledîyaya Dêrsimî yê BDP Nurhayat Altun û Mehmet Alî Bul û xeylê sîyasetmedar, aktîvîst û rêxistinê bînî beşdar bîy.

Meydanê newroze de sloganî sey “Newroze xoverrodayîş o” û “Şehîd nêmirenê” erzîyay. Gultan Kişanak qisey kerd va ke “Dêrsim yew destan o, yew eşq o, ruhêde îsyanî tey esto. (…) Mizur rê, Duzgîn Bawayî rê, Seyîd Rizayî rê sozê ma esto.” Dima, endamê ESP MYK Sitki Gungorî qiseykerdişê xo de duştê xoasîmîlekerdişî de vindet, va “Nameyê nocayî Dêrsim o, ma dêrsimij îme, nameyê nê erdan Kurdîstan o. Ma kurd îme. Bawerîya nê erdan elewî ya, ma elewî yîme.”

Qiseykerdişan ra dime meydanê Seyîd Rizayî de bi slogan û tilîlî adirê newroze ame wekerdene. Hunermendanê sey Suavî, Erdogan Emîr û Mikaîl Aslanî kilamî vatî.

1 ŞÎROVE

Comments are closed.