Futbolbaz Mesût Ozîlî Werder Bremen caverda û şî ekîbo girs Real Madrîd. Vatenan ra gore transferê Ozîlî Real Madrîd rê bi (ebe) 17 mîlyonî hesab bî. Real Madrîdî raver ra kaykerdoxê ekîbê milî yê Almanya Samî Khedîra herînaybî.

Mesût Ozîlî transferê xo ra tepîya rojnameyanê xeylê dugelan ver va, “Mi nika gama tewr rind a karîyerê xo yê futbolî eşte û naye ser o ez zaf şa bena. Real ekîbedê tewr rind na dinya ra yew (ju) yo. No ekîb de kaykerdene ra tersê mi çin o. Dormeyê mi de estareyê dinya estê, naye ser o kî zaf keyfê mi ame. Ez potansîyelê xo ser o haydar a.”

Antronorê Madrîdî transferê estareyê ekîbê Almanya ser o zaf bî memnun, çike xeylê reyî Mourînhoyî eşkera kerd ke o bi xo transferê Mesûtî wazeno.

Ozîl hîna 21 serrî yo û kayanê kupayê dinya yê Afrîkaya Başûrî de yew performanso rind musnaybî. Di serran ra ver seba çar mîlyon Euroyî lîgê Almanya de Schalke 04 ra transfer bî bi Werder Bremen. No waxt de Bremen de zaf rind kay kerdo û 17 reyî ekîbo milî de vejîya saha. Estareyê futbolî Bremen de 71 maçan de kay kerd û 12 golî eştî. Xebera rojnameyêda Spanya ra gore Mesût serre de 5 mîlyon Euroyî qezenc keno.

Heta nika derheqê kokê Ozîlî de çîyê tam eşkera nîyo. Kurdî vanê ke o kurd o, tirkî vanê ke tirk o. Cewabo qetî hîna nêame vatene, wa werenayîş dewam keno.

 

CEWAB BIDE

Keremê xo ra şîroveyê xo binuse
Keremê xo ra nameyê xo binuse