Emser ancîya (onca) serrgêra terteleyê Helebce ke tede 5.000 ra zêde însanî merdî, Tirkîya û Kurdîstan de ameye yad kerdene.

Jenosîdê Helebce xeylê şaristananê Kurdîstanî de ame protesto kerdene. Colemêrg de serekê BDP Orhan Koparanî qisey kerd va ke “Helebce de 5.000 ra zêde cinî û domanî amey kiştene, bi hezaran kesî bîy dirbetinî. Kesê ke heyat de mendîbî, qenser girewt, çimê xo bîy kor. Hîna domanî seqet yenê dinya. No tertele ma protesto kenîme û venga şarê kurdan danîme ke destê jubînî (yewbînan) bicêrê.”

16-17. adare 1988 de artêşa Îraqî bi bombayanê kîmyewî hêrişê şaristanê Helebce kerdîbî, 5.000 ra zêde kurdî amey kiştene. Nêzdîyê 10.000 kesî giran bîbîy dirbetin. No qirkerdiş xeylê serrî ame înkar kerdene û heta nika fîrma ya kî welatê ke no gazê bombayan roto Îraq nêvejîyayê dadgehan ver. Emrê nê qetlîamî hetê Saddam Huseyîn û serdarê vakûrê Îraqî ra ke jê (sey) Alîyê Kîmyewî nas bîbî, ame dayene. Hur dimêna (Her dîyan) amey darde kerdene. Enformasyonanê pisporanê sîyasetî ra gore, no îdam lerze ame kerdene, bê perskerdiş derheqê qetlîamê Helebce de nê di berpirsîyarî amey darde kerdene. Aye ra şirket û dewletanê ke bombayê gazî rotîbî Îraq, nêamey zanayene. Yeno zanayene ke destê welatanê je Hollanda, Almanya, Misir û Tirkîya rotişê nê bombayan de bîyo.

Heto bîn ra parlamentoyê Ewropa da derheqê terteleyê Helebce de ju (yew) konferans yeno viraştene.