Lîbya de serewedaritiş ra tepîya pêrodayîş û lej dewam keno. Hêzê ke girêdayeyê Kaddafî yê, wazenê ke şaristanê jê (sey) Zavîye, Ras Lanuf û Ecdebîye ancîya (onca) bicêrê binê kontrolê xo.

Şaristanê Zavîye de ke 50km Trablus ra dûrî yo, hêrişê mîlîsê Kaddafî ra dime xeylê kesî amey kiştene. Enformasyonanê rojnameyanê dinya ra gore no pêredayîş de 18 mîlîsê ke duştê Kaddafî de danê pêro û 30 sivilîan ra zêde amey kiştene. Di hetî kî melumatanê cîya-cîyayan danê, hur dimêna (her dîyan) kî îdîa kenê ke ê şaristanê Zavîye kontrol kenê.

Hêzê Kaddafî bi tank, helîkopter û bi teyaran ra wazenê ke şaristan ancîya (onca) peyser bicêrê. Bombarduman de şaristanê Bengazî de 27 kesî amey kiştene. Kovara almane “Der Spiegel” ra gore cayo muhîmî yê petrolî Ras Lanuf de xoverdayoxan hêzê Kaddafî eştî peyser. Nika uca (uza) de ters nişto ci ke Kaddafî heyfê naye giran bicêro.

Di hewte yo ke Lîbya de şar duştê klanê Kaddafî de vejîno û wazeno înan welat ra teber bikero. Roja 03.03.2011 de kî Dedgeha Ceza ya Mîyenneteweyî yê Den Haagî sebebê şikê sucê duştê însanîye ra Kaddafî û lajanê xo ser o tehqîqat viraşto.

No klan heta nika 200 mîlyarî Dollarî ra zêde pere petrol ra qezenc kerd, labelê no pere mîyanê şarî de ney, tena werteyê dorûverê Kaddafî de vila bîyo. Pereyî Ewropa û Amerika de depo bîy. Kaddafî û merdimanê (mordemanê) xo no pere ra heta nika xeylê dayîre û sermayegozarî Ewropa û DYA de herînay. Nê sermayegozarîyan ra qederî kî klanê Kaddafî dinya de fîrmayanê muhîman ra para xo girewte girewte. 3,3% yê grûba çapemenî ya Îngilîstanî Financial Times, 15% yê para konsernê telekomunîkasyonî yê Îtalya Retelit ra, 7,5 bankayê Îtalya Unicredit ra, nêmedarîya Fiat, Finmeccanica û Enî, aye ra kî dot 7,5% yê ekîbê futbolî yê Îtalya Juventus û xeylê fîrmayanê bînan de para Kaddafî û merdimanê (mordemanê) xo esta. Bankayê merkezî yê Lîbya de kî 110 mîlyarî Dollarî rezerveyê dovîzî estê.

Bi xovereştişê şarî no taw dîktatorîya Kaddafî hetê fînansî ra kî tenge der a. Heta nika tena DYA de 30 mîlyarî Dollarî kapîtalê klanê Kaddafî ame cemednayene. Îngilîstan de kî xeylê mîlyar Sterlînî pere ame cemednayene. Pisporanê ekonomî ra gore Kaddafî û grûba xo dugelanê (duwelanê) dinya de nêzdîyê 200 mîlyarî ardî pêser.