Na, rastiya to wa.

Rastiya to, kamiya to, zonê to de ro.

Na dınya de, şıma çı wazenê bıwazê, eger ke wastena şıma, ebe rastiye u kamiya şıma me bo, qimetê xo çin o.

Demoqrasiya ke şıma wazenê, kamiya şıma u zonê şıma tede çini bo, a demoqrasiye o heq u huquq, ê şıma niyo.

Xo mexapnê.

EBE ZONÉ TIRKİ, KAMİYE U RASTİYA ŞIMA RA DEMOQRASİYE NÉNA.

Çıqas marifet u hunerê şıma bı bo ke, ebe zonê şarê de bini, şıma nêxelesinê ra.

Ebe zonê Almanki, şarê Fransi ra demoqrasiye niyame u nêna.

Ebe zonê İngilızki, şarê Almanan ra demoqrasiye niyame u nêna.

Demoqrasiya, seba her şariyo, heqê her şariyo.

ŞARO BÉ ZON SE KE ÇİN O, ZONO BÉ ŞAR Kİ ÇİN O.

Şıma, bı zonê xo benê ‘şar’.

Şar, bı zonê xo beno wayirê kamiya xo.

Dara ke koka xo de bıbıriyo,qimetê pel u gılê xo çin o.

Pel u gıli ke koka xo de bıvısiyo, va, ê pel u gılan gorê kêfê xo her hêl ra dano verê xo beno.

İyê ke na rastiye fam nêkenê, koka xo de vısiyê.

Ma tı ke koka xo de vısiya, seba rastiye u kamiya xo niya, tı ‘alım’ bê, ma ra çı, ‘malım bê’ ma ra çı?

Xo ra ‘derdo gıran’ no wo.

Tayê ‘baqıli’! hina ma ra, kılama ‘lêylege’ vanê.

Vanê ke ‘Zon muhım niyo, mordemiye muhım a’.

Tı zen kena ke nê ke niya vanê, biyê ‘mordem’!

Se ke ju hevalê mı gege vatê;

‘LA-LAWO RAYA XO DE ŞO’!

Raya xo de şo ‘baqıl u baqıle’ raya xo de şo!

Hina xo nêxelesno ra, hina zon u kamiya xo, beşe nêkeno, fam nêkeno, mı ra qalê, ‘demoqrasiye u dınya aleme keno.

Tew!

Baqıl u baqıla mı!

Koka xo de vısiyê, biyê kengerê verê vayê zonê asimilasyoni, ebe no hal, mı ra qalê ‘rındiye u mındiye’ kenê.

Ma ke qalê ecêbiya ninan kerd, vanê ‘ez miliyetci niya’!

Rastiye u kamiya ke dınya aleme seba xo wayir vencinê, ê ‘milliyetci’! niyê, waxto ke ma qalê rastiye u kamiya xo, qalê zonê xo kerd, ma benime ‘Milliyetci ‘ Ha!

Mordemiye çık a?

Demoqrasiye çık o?

İnsanetiye çık a?

Nê pêro heq u huquqê insanan niyê?

Ma insani çık ê?

İnsano bê şar est o?

Şaro bê insan est o?

Mordemiye aqıl bıdo şıma, ez se bıkeri!

‘Homa, Xızır, Heq’ akıl bıdo şıma ez vaci çı?

Yunanki ke miyamêne nusnayene, ma ne ê filozofan nas kerdêne, ki şarê Yunani. Xo ra zonê Yunanki ke çinibiyêne, ne welat ne ki şarê Yunani nêbiyêne.

İsrailê ke dınya de vıla bi bi, eger ke zonê xo pêyda nêkerdêne, dewleta İsraili nêbiyêne.

Demê de kılm de, İsrailê ke dınya de vıla bi bi, verdê zonê xo zelal u standartize kerd, ebe no hal, wastena xoyê serbestiye, wastena heq u huquqê xo kewti raye, dewleta xo vıraştê.

Zonê İsraili ke bıqediyêne, çinibiyêne, ewro dewleta İsraili ki nêbiyêne.

Demê de kılm de, İsrailan ebe dewleta xo, mabênê vist dewletanê Ereban, de parya wo.

Zon u kamiye ra wayir veciyene niya wo.

Yanê zê ê tayê ‘baqılanê’! ma niyo.

‘Baqılê ma’! Handayê ke gege bı Tırki vanê, ‘’Dilimize, kimliğimize sahip çıkalım’!

Ma, se ‘sahip çıkalım’!

Ebe Tırki?

‘’LA-LAWO RAYA XO DE ŞO!’’

İlhami Sertkaya