Nameyê partîye Partîya Azadîya Kurdîstanî (PAK) a. Yew serr a ke PAK sey teşebus dest bi fealîyetê xo kena, 19. oktobre 2014 Dîyarbekir de êdî awankerdişê xo îlan kerd.

Kombîyayîşê sazkerdişî de sîyasetmedar Mustafa Ozçelîk sey serekê pêroyî ame weçînitene. Kombîyayîş Dîyarbekir Sûr, otelê Green Parkî de ame viraştene. Beşdarî sazkerdox, endam û xeylê kesê silayîbîyayeyî bîy, sewbîna, Kurdîstanê Vakur û Başûrî û Ewropa ra sîyasetmedarê kurdî sey Sertaç Bucak, Îbrahîm Guçlu, Osman Ozçelîk, Îmam Tasçier û Halîm Îpek estbîy.

Bi wendişê marşê kurdan Ey Reqib û aliqnayîşê alaya Kurdîstanî kombîyayîşî dest kerd ci. Qiseykerdişê serekê pêroyî Ozçelîkî de ame ardene ziwan ke Şêx Saîd, Seyîd Riza, Îhsan Nurî, Şêx Mehmûd Berzencî û Mele Mustafa Barzanî seba ke alaya Kurdîstanî azadane pêl bido, mucadele kerd. “Çiqas ke Helebce û Enfal bîy destpêkê Kurdîstanê Başûrî, hende kî qetlîamê Şengal û Kobanê benê destpêko tarîxî yê yewîye û dewletbîyayîşê kurdan.”

Boyna, Ozçelîkî derheqê partîye de qisey kerd va ke serra 2013 de Dîyarbekir de da-400 kesî amebîy têlewe û gamê verênî eştî ke partîya kurdîstankî awan bikerê. “Tam yew serr a ke ma sey teşebus xebata xo ramitêne û ewro PAK rest awankerdişê xo. Ewro dewlete estbîyayîşê kurdan qebul kena. Hetta birêz serekkomar Recep Tayyîp Erdoganî, herçiqas ke bi firsendê zîyaretê birêz Mesûd Barzanî bî, çekuya Kurdîstanî xebitnaye. Na îfadeya rastî ya, dewlete seba heqanê ziwan, perwerde û kulturî tayê vurîyayîşan ana ca. Nê pêro tabî muhîm ê.”

1 ŞÎROVE

Comments are closed.