Qetlîamê Mereşî ser o 33 serrî vîyartî. Qirkerdişo wehşî yê Mereşî de nêzdîyê 500 elewîyê kurdî ameybî kiştene. Bi kilmekî serebûtê Mereşî:
- Raver ra rayberê qizilbaşan Sabrî Ozkan hetê merdimêde (mordemêde) tirk ra ameybî kiştene, 21. kanûne 1978 de kî di wendekarî.
- 22. kanûne 1978 de çêberê (keyberê) qizilbaşanê kurdan bi boyaxo sûr ra amey îşaret kerdene. Îmamanê camîyanê tirkan duştê kurdanê qizilbaşan de xutbeyî wendî. Herçiqas ke amadekarîya qetlîamî bellî bîye, dewlete û serekwezîrê ê demî Ecevetî tedbîr nêgirewt.
- 23. kanûne de qirkerdişo gonin dest kerd ci. Ban (bon) û dikanê kurdan hêriş bîy. Tayê banî (bonî) amey veşnayene, însanî hîna tede bîy. Xeylê kesan zulm dî, însanî qir bîy, cinîyî amey tecavuz kerdene. Jê (sey) netîce 500 kurdan canê xo day, 1.000 banî (bonî) veşay. Kurdanê elewîyan Mereş terk kerd.
- Qetlîamêde nîyanên 13 serrî tepîya Sêwas de prova bî. O qirkerdiş ra dime xeylê kurdanê elewîyan Sêwas terk kerd.
- Heta nika qetil û planviraştoxanê nê di serebûtan hetê qet dadgehe ra ceza nêgirewta. Hetta ê û tayê avûkatê înan dima parlamentoyê Tirkîta de bîy wekîl.
