Berpirsîyarê Grûba Xebate ya Vateyî yê Dîyarbekirî
“Grûba Xebate ya Vate”yî roja 01.04.2013 de Dîyarbekir de kombîyayîşê xo yê 23. viraşt. Kombîyayîş badê 4 rojan roja 04.04.2013 hela şanî de qedîya.
Grûbe 1996 ra nato şeş aşman ra hewêk kom bena û xebata ke kerda, rojeva xo bi tarzêko îlmî qisey û munaqeşe kena. Grûbe 6 aşman ra hewêk tewir-tewir cayan de kom bena. Hetanî serra 2005an welatanê Ewropa de, yanî teberê welatê xo de kom bîyêne. Labelê nê heşt kombîyayîşî yê welatê xo Kurdîstanî de virazena.
Grûbe zaf kombîyayîşî bi îmkananê xo viraşta. La nê çend kombîyayîşê bi hetkarîya tayê sazî û dezgehanê ma kurdan virazena. Kombîyayîşê 22. bi hetkarîya Beledîyaya Bajarê Girdî viraştbî. No kombîyayîş zî bi hetkarîya “Beledîyeya Rezan” viraşt. Ez sey yew berpirsîyarê na grûbe nê beledîyayanê ma ra sipas kena û keyeyê înan awan bo.
Endamê na grûbe sey kombîyayîşê 22. reyna otêla Dîes de rakewtê û Salona Parka Sumerî de xebata xo domna.
Roja ewilî saeta 13:30 wendekarê Unîversîteya Artuklî ya Mêrdînî yê ke beşa kirmanckî de wanenê, bi şeklêko meymanî beşdarê nê kombîyayîşî bîy. Bi na beşdarîye heyecanê kombîyayîşî zêdîya. Hem qasî 20 hebî wendekarê îstîqbalê kirmanckî û hem zî nê endamê grûbe bikeyfweşîyêka kezebzîze qasî saetêk û nême têreyde mendî. Her dî qismî zî yewbînan ra persî pers kerdî û cewabî day.
Grûbe roja verêne plan û programê xebata çar rojan amade kerd. Dima bi dore dest bi xebata rojeva xo kerd. Verê, derheqê rastnuştişî de tayê çîyan ser o vindert. Dima zî standardîzasîyonê tayê name û xususîyetanê heywanan ra dest bi munaqeşeyan kerd.
Grûbe bi 19 endaman kom bî. Esas 25 endamê grûbe estî. Tayê mazeretan ra şeş kesî nêeşkayê bêrî. Înan ra serekê kombîyayîşî Munzur Çem zî çin bi. Nadîre Guntaş Aldatmaz reya verên a ke beşdarê kombîyayîşî bena. Bi beşdarê Nadîre Xanime hûmarê endamanê cînîyan bî di hebî. Aye ra ver Netîce Altun tena endama cinî bî.
Roja peyêne zî plan û programê kombîyayîşê 24. viraşt û kombîyayîşê xo temam kerd.
