Kobanê de pêrodayîşê giranî

0
614

Çar rojî yo ke rêxistina terorîste ke xo sey “Dewleta Îslamî” (DÎ) name kena, hêrişê kantonê Kobanê yê Kurdîstanê Rojawanî kena. Melumatan ra gore heta nika hewt cengdaranê YPG canê xo day.

Goreyê xebera ANF ra, Kobanê de pêrodayîş dewam kenê. Hêrişê DÎ ke 15. êlule de dest kerd ci, bi şidet dewam keno. “Cebheyanê rojhelat, rojawan û başûrî de çeteyî bi tank, top û fuzeyan hêrişê giranî kenê”, hetê YPG ra ame dayene zanayene. Cebheyî “dewê ke başûrê Kobanê de yê Qumçe, Qilhaydê, Cadê û Kunxeftar, rojhelatê ci de Korik, Îdaniyê, Badik û Metînî û rojawanê ci de kî dewê Degîrmen, Boraz, Zerik, Talik û Cibilferac ê.”

YPG ke panc cebheyan de danê pêro, heta nika hewt cengdarê xo kerdî vîndî. Melumatanê YPG ra gore 60 endamê DÎ amey kiştene. Ancîya, hetê YPG ra eşkera bî ke dewleta tirke ardimê lojîstîkî yê çeteyan kena: dewleta tirke bi tren muhîmato eskerî rusnena çeteyanê DÎ.

Heto bîn ra bi hezaran kesî texdîdê DÎ ver remenê bi Kurdîstanê Vakurî. Labelê sînorî hetê eskeranê tirkan ra cadaye yê. Xeberan ra gore tewr tay 3.000 hezarî kurdan waşt ke sînorê Kurdîstanê Vakurî bivîyarnê, labelê hêzê asayîşî yê Tirkîya destûr ci nêda. Hetta eskeran bi wasita û polîs ra pîya mudaxeleyê bextwaştoxan kerd. Rîyê cengê bi terorîstanê DÎ ra, nufusê Kobanê 100.000 ra çar qatî bî zêde bi 400.000.