Kaddafî ra rexneyê Tirkîya

0

Werteyê pêrodayîşê goninî ê Libya de sereko nikayin ê Lîbya Muammer Kaddafî kanalê televîzyonî yê dewleta Tirkîya TRT Turk de qisey kerd û Tirkîya giran rexne kerd. Sebebê rexneyî ra kî leteyê qiseykerdişê Kaddafî televîzyon de ame birnayene.

Kaddafî qiseykerdişê xo de qedexeyê teyarayan asmênê Lîbya de rexne kerd û nîya vat: “Nika Tirkîya de şarê kurdan esto ke heqê xo wazeno, ê kî wazenê ke dewletêda xosere ronê. Xeylê serrî yo ke artêşa tirke kurdan de dana pêro. Çayê asmênê Tirkîya seba teyarayan nêno qedexe kerdene? Ne DYA ne kî Ewropa seba naye qerar dano. Çayê?”

Roja bîne kî Kaddafî Barbaros Hayrettîn Paşa ser o nîya vatîbî: “Eke pêrodayîşê Lîbya nêqedîna, Barboros ancîya (onca) yeno Deryaya Sipîye de korsanênî keno.”

Nê rojan de lîderîya Kaddafî xeylê çetinîye ancena (oncena). Pêrodayîş de ke dorê di hewteyan ramit, 1.000 ra zêde kesî merdî.

CEWAB BIDE

Keremê xo ra şîroveyê xo binuse
Keremê xo ra nameyê xo binuse