Beno, nêbeno, hina ke astori nêbi bi ‘ATLAR’, vaşi nêbi bi ‘OTLAR’ ju çêneka kıjkeke, hevala domantiya mı este biye. Mı aye ra vatêne ‘Surela’. Nêzdiyê çewres sera wa ke, mı aye nêdiya. Ame mı vire, se bıkeri? Çı waxt ke ez  bı zonê ma de qesi kena, a yêna  mı vire. Ebe aye, ê veroji, ê zımi, ê vengi, ê rengi yêne mı vire. Ezo budela, mı zaf çi vindi kerdo.

Ezo reben, ezo belengaz, ezo bı bela..

Ez wazena seba xatırê  ê verojan, seba xatırê a domantiya ma wa ke tırtê, seba ê dar u kemerê ke ma piya kay kerdê, Surela ra veng bıkeri.

Surela!

Vengê mı bıheşêne, ez seba to nusnena.

Hevala domantiya mı Surela, tı nıka koti de ra? Ma piya ê verojan de kılaman vatêne. Ma kenger arê dêne, henê kemeran kerdênê destanê xo ra. To mı ra kılaman vatêne, vengê ma kewtêne têmiyan.

Ma piya qefeliyêne, piya texeliyêne.

Şıliye varêne serê ma ra, ma piya biyêne hit.

Ebe paçan u darıkan kaykerdêne ma.

Awa deran de destanê  xo şutêne, siya daran de arasiyêne ra.

Bınê tija amnani de, araq rışiyêne sarê ma ra.

Tırk u Tırki nêkewti biyi ê verojan, veroji zelal bi.

Vaşi hina nêbi bi ‘OTLAR’.

Astori hina nêbi bi ‘ATLAR’.

‘ATLAR’ u ‘OTLAR’ ma jumıni ra vısna.

Tı nıka kameji şuke de ra, weş a, nêweş a?. ‘Perda sıpitiye, serê porê to ra, xo vıla kerda?

Ez nıka xeribiye de, mı  rojan u aşman kerdo têmiyan, hesrete barê mı kerdo gıran.

De ‘can weşiye bo’  lê!

Tı qalê xo bıke, rındeka mı!

Çend dem u dewrani, çend newrozi Verdi ra, çend huyene, çend xem u xezeb ma viyarna.

‘Mahzun Kırmızıgulê ma’! vano ke ‘ez nêşaniya we, payra wa’:

Tı zen kena ke, ma tawa nêdiyo, êy diyo.

De xora ‘kam bı cefa, kam bı sefa’.

Ne verojê ma mendi, ne vengê ma.

Na dınya niya ra, cigera mı.

Derd para ma, namdariye para inan.

Xemê kamiyo ke ma weşime, nêweşime, ‘bomê’?

Tew!..

Tı mı ra a kılame vace Surela.

É veroji zerê mı de rê.

Çênê ez vaci to ki şuşe  kerdo ‘ŞİŞE’?

Ez vaci to ki kıncan kerdo ‘ELBİSE’?

Ez vaci tı ki vana ‘HER NE İSE’?

Eke niya ro, Xızır bo ke ‘YARAMAZ İŞE’.

Qey ma to awa inkar u tofani şımıta ‘BİŞE?’!

Domanê to est ê  Surela?

Biyê gırs?

A kılame hina mı vir de ra. A kılama ke name xo ‘Cirane’ biye.

‘Na cirana mı berbena, qom şirın o terk nêkena’

Ez vaci to  na kılame xo vira kerda ‘bomê’!

Ez ‘baqılan ra’ bêzar biya, tı kewta vira mı ‘bomê’!

‘Nêrê’ internetê to çin o? Tı nêşıkina mı ra e-mail bıruşnê ‘bomê’?

Waxtê mektuban vêrd ra. Kaxet u maxeti qediyayi, rınd ke qediyayi.

Her roj sere masa mı  de, kaxetan ra ca çini bi. Mı rojê reca dexelet kerd ju hevalê xo ra, maya mı arde msn ma jumıni di, piya qesi kerdime.

Maya mı inam nêbiyêne ke ez a, mı ra vatê ‘Ez qeda tiya’?

-Heya dayê ez a, Xızır bo, hard u azmên bo ke, ez a

Ma nê rojan ki di Surela. Mı maya xo ra zaf çiyan pers kerd, seba to ki pers kerd, va ‘ez nêzana Surela koti de ra’.

Bê, verojanê ma biya.

Bê, seba eşqê domantiya ma kena ke bê.

‘Nêrê bomê’ vanê nıka ‘açılım’! est o, ezo budela tawa  ‘fam nêkena’!, nêşıkina bêri, ma tı?

Tı koti de ra Surela?

Nıka usar o, veroj u zımanê  ma de, gul u çiçegi, sarê xo verba azmên berz kerdê, heni niyo? Şên u şênatiye menda dewanê ma de? Domani kay kenê ê hêgan u deran de? Domanê ke şukan de yênê dewe, vanê ‘ATLAR’ U ‘OTLAR’, ya vanê ‘ASTORİ’ u ‘VAŞİ’? Domani ‘RAYE’ nêzanenê, vanê ‘YOL’? Domani ‘LOBİ’ yê ma wenê, ya ‘HOBİYÉ TIRKAN’ kay kenê?

Ma tı?

Tı çı hal de ra, Surela?

Çênê ez vaci ‘enternasyonalim u ataqrasyoni, manipulasyon u qapitalizmi, kahrolsın  u yaşasıni, analiz u manalizi’ kamiya to, to ra vısna?

Wi! Bextê to de ra !

Meheliye, meqediye.

Surela!

Eşqê domantiya mı Surela, tı koti de ra?

İlhami Sertkaya

23-3- 2010

Nuşteyo peyênŞiwane ra hakim
Nuşteyo verênEkonomîya Ewropa rê se beno?
Îlhamî Sertkaya
Îlhamî Sertaya Çewlîg ra yo. Dewa xo Pîrcan (tirkî: Adaklı) girêdayeyê Azapêrtî yo. Perwerdeyê xo Îlhamî Sertkaya enstîtuya malimî ya Çewlîgî de dî. Serranê 1970-1980 de malim bîyo, 1982 welat terk kerd û şî Ewropa. Îlhamî Sertkaya ewro nuştox o, kitabê ey hem bi tirkî hem kî bi kirmanckî û kurmanckî (kirdaskî) estê. Hîrê reyî endamê jurî yê Xelata Edebîyatî ya Huseyîn Çelebî bî. Giranîya eseranê Îlhamî Sertkayayî şîîr û roman ê.