Ez nêzana, nêzana…
Ez ‘nezan’ niya, hama roja biyena xo nêzana.
Roja ke ez biya, nêzana kameji roje wa. Heftan de ju roje wa hama kameji roje wa, ez nêzana (mehuyê).
Maya mı vatê ke; ‘lacê mı, roja ke tı ama dınya, ju roja amnani bi, rojê de germ bi, şuyanê dewa ma nêweş bi’.
Yanê ez ‘ ju roja amnaniyo germ, roja ke şuyanê dewa ma nêweş biyo, ez a roje ama dınya’.
Hı hı hı…
Şıma zanenê? Cawo ke ez ama dınya, nıka xan u xırabe wo. Warê ma çiniyo. Warê ma vêşê, warê ma şaniyê we, nıka zê maxa kemeran vınete wo. Coka ke namê mı, namê warê ma, dewa ma, roja biyena mı, serê kaxeta ke memurê Tırki nusnê, zur o.
Tayê çiyi est ê, çı hêf ke, mordem bıwazo bızano ki, endi biyê vindi, nêşıkinê bızanê.
Coka ke mı, kaxeta nufusê Tırki, dırna. Ne pasportê inan gırot, ne roja biyena xo wa zure, qebul nêkerd. Çı ke, zur o.
Zur u zurekeriye, qederê ma ra, biyê ‘efendi’.
Kê (çê) to bıveşo ‘efendi’!
To domantiya mı, xortiya mı, roja biyena mı, rastiya mı tırt ‘efendi’!
To emrê mı tırt!
Hesabê mı ebe to est o, qesasê xo to de gêna. Adıro ke zerê mı de ro, zurekeriya şıma vêşneno. No dem, no dewran, şıma ra nêmaneno ‘efendi’! Ez mıradê to nêkena. Qesasê zonê xo, kamiya xo, rastiya xo, to de gêna.
‘Tı vınde ero! Tı vênena’!
Ez vengê rastiye wa. Ez vengê zonê ma, rengê kamiya xo wa. Zurekeriya şıma, dırnena, qefçıliya inkarê şıma, rışnena. Nişanê ‘medeniyetê’! şıma, xırabiya maxa koliyan u kemeranê warê ma wo. É maxanê kemer u kuçan de, her roj nıka, mar u mılawini, têyr u tuki ser de gi kenê.
No ‘huner u marifet’!ê şıma wo.
‘Maxsad vatan qurtılsın ha’!
‘Maxsad demoqrasi olsın ha’!
De ‘olsın’!
‘Olsın ero’!
Heq u huquq, şıma ra adet, ma ra tomet ha!
Ebe no hal, şıma ‘bıratiye’! kay kenê ha!
Dersa ‘demoqrasiye’ danê ma, ha!
Serê inkarê ma de, ‘medeniyet’ kay kenê, ha!
Mı qalê roja biyena xo kerdêne. A roja biyena mına ke, ez nêzana.
Şıma mı de ‘aqıl nêvırda ke’ !
Ez se bıkeri?
İlhami Sertkaya
27-3-2010
