Ancîna yew (zu) cinîka dera Avdelîzî ra şîya sûke (bazar). Sûke de yew hay-hingimên esto. Hetê ra şîlîye varena hetê ra kî qelebalix o. Cinîke şîya, yew kîlo sayî waştê. Dormê dezgehî kî qelebalix bena.

Dezgehdar, tam yeno kî yew kîlo sayan senceno, cinîke vana, “Yew kîlo mebo, yew kîloyo nêm bo”.

Dezgehdar ancîna tam senceno kî, cinîke reyna fikrê xo vurnena. Vana, “Xo rê di kîloyî bê”.

Dezgehdarî xo rê qefelîyo, da ro canê xo, vengê xo kerdo berz, vato, “Xalikê, xalikê! To ez kerdo xêx, ez kerdo xêx.” Tabî cinîke kî binê qisa de nêmanena , a kî vana “Ti biaqil nîya ke xêx be. Ti xora xêx a”. Cinîke pereyê xo dana, sayanê xo cêna, herinayîşê xo ra dewam kena.

Tayê raye şona ke rastê yew cinîka merdimanê (mordemanê) xo bena. Leweyê cinîke de yewê kî cîrane bena. A kirmanckî nêzanena. Tayê tirkî qisey kenê, hal-xatir pers kenê. A linge de benê cîya ke cinîke merdima xo ra vana, “Sonê kotî?”

Çi ke nîya vana, cîrana ke kirmanckî kî nêzanena, şaş bena, bena biheyecane. Pers kena, vana “Sonu kötü mü? Kimin sonu kötü? (Peynîya xo xirab a? Peynîya kamî xirab a?)”

Qesa u Resm: Verdo Nimerem