Destpêkerdena nê nuşteyê xo de ez kî kedkar û karkerê feqîr û fiqareyan ke binê şert û şûrtanê giranan de edi Manîsa, Soma de ocaxa komirî de xebetîyay û canê xo ra bîy, yanî kesanê ke wefat kerdo, înan bi rûmet yad kena û keyeyanê înan rî sereweşîye wazena.

Hey wax û hey leminê dayê, na rey merdene vengê xo Soma de kerd berz. Na rey merdene vengê xo werteyê toz û dumanê komirî ra kerd berz. Na rey merdene vengê xo teng û tarîyê zîndanê ocaxa madenê Soma de kerd berz. Na rey korfelekî vengê xo feqîr û fiqareyî ser o kerd berz. Na rey merdene vengê xo bi vengê şîn û şîwarê dayîkan kerd berz.

Na merdene nêbîye, no qederê nê însanan kî tewr nêbî, no qetlîam bî, qetlîam. Sebebê nê qetlîamî kî, sebebê merdena nê hesîran kî, sebebê merdena nê bêkesan kî, sebebê merdena nê belengazan kî, sebebê merdena nê feqîran kî Receb Tayyîp Erdogan bi xo bî. Ju qeseykerdena xo de kî “Nê karê nîyanênî de hertim weqetê nîyanênî benê û benê kî…” vano. Mordem vatena nê dîktatorî ra naye tespît keno, yanî merdena nê karkeran honde muhîme nîya, êndî bîya û şîya.

Herçiqas ke Erdogan na weqete bi “bîya û şîya” xo ser bierzone kî, herçiqas ke hûmara meyîtan eşkera mekerê kî, raştî kî na weqete de zaf girane bîye. Na weqeta ke ama feqîr û fiqareyî ser, gere ke hesabê na weqete Erdogan ra û hukmatê ey ra bêrone pers kerdene. Nê weqetê peyênî reyna rind musnenê ke Tirkîya de qedr û qîymetê keda însanî misqale çin o.

Goreyê vatenan nê karkeran mîyan de ju kî domano des û ponc serre esto. Sebebê merdena nê xortê des û ponc serrî kî oncîya Erdogan o. Çinke mileto feqîr motacê pîranê nonê kerdo. Hukmatê Erdoganî milet ardo ra no hal. Ewro Tirkîya de domanî zaf serranê qican de dest bi kar kenê û binê zaf şertanê giranan de kî xebetînê.

Tirkîya de her kes kî rind zano ke heq, huqûq û adelet çin o. Tirkîya de her çî “tewkelî bavokê Elî yo.”

Hey wax û hey leminê, Tirkîya de qedr û qîymetê însanan nêno zanitene. Karkarê ke Tirkîya de xebetînê, zaf binê şertanê giranan de xebetînê. Zaf karkerî heqanê xo ra marum ê. Nêke teyna karkerî marum ê, Tirkîya de hama-hama herkes heq û huqûq ra marum o.

Dîktator Tayyîp Erdogan bi demê aştîye miletê bindestî texelneno. Seke bi nê texelnayîşî weçînitişê 30. adare ra vecîya, oncîya bi nê metodê demê aştîye şono weçînitişê serekkomarî. Çi heyf ke çekuya aştîye gureta fekê xo û bi na çekuye hem ca dano xo û hem kî ca dano partîya xo.

Tawayê nê dîktator bi meseleya aştîye û maştîye çin o. Werte ra xeylê waxt vêrd ra hona seba aştîye gamêda rinde nêama eştene û bi no qeyde nêna eştene kî.

Ma êndî xo mexapnîme, no dîktator miletî texelneno. Ju vatena ney a raşte çin a. Zur, zulm û zordarîye ra dot çîyê çin o. No sebeb ra kî gere her kes vengê xo berz kerone û hesabê nê qetlîamî bêrone pers kerdene. Eke nêame pers kerdene, reyna feqîr û fiqar tepîya ra şono.

4 ŞÎROVEYÎ

  1. Anika bira mi fehm nikerd, ti rast vanî ”korfelekî vengê xo feqîr û fiqareyî ser o kerd berz”, heyf heyfê merdan o la çirê tera sîyaset kenî şima mi fehm nikerd. Tirkîya welatê averşîya nîya ke nika bi suprîz ke maden de qaza qewimîya. Kurdê ma bi anahewa meselan mijul nêbin, problemê ma estî. Ez vana qey guna Erdoaxanî an jî polîtîkaya Tirkîya nîya la problemê tirkan û ehemîyetê madenan o. Qey tirkan berma heke kurdê Îranî îdam bî an jî Xaneqîn di suîkast estbi? Her kewno çamur, kurdê ma qirenî Faşîşt Erdogan Faşîşt Merdogan bimro koledarî bimro kapitalîzm eeeeee derdê ma no yo qey bira xo mexapne!!

  2. Xeyran bira, ez bi heyranê birayê xo mişaş fam meke, raştî kî nê şîroveyê to ra mi çîye fam nêkerd.

    Lê ez oncîya kî tayê çîyan birayê xo re bîyarî ra ziwan. Nika kam beno wa bibo,Kurd beno, Tirk beno, Ermenî beno, Ejnebî beno… însano ke ci nêheqîye bîya, însano ke ci zulm û zordarîye ama kerdene, helbet ez kî lêwe zulmkarê Erdogan de nê, lêwe mazlum de cayê xo cêna. No feqîr û fuqareyo ke merd, ribalê rîye dîktator Erdogan ra merd. Eke esto problem, problemo tewr gird îstîfa nêkerdena dîktator Erdoganî ya.

  3. E bira ti raşt vanî madenkarî mazlum î guna înon çinî ya ke ez çîyêk vajî. Înon rê canê mi feda! Mi şaş fehm meki ez nêvana Erdoxan hol o, leyîrê şeytanî despot o xirab o. La çi îş o ke her çî kenî mesela sîyasetî Kurdistan di kuçeyan kenî pirr hemen benî oynkarê sîyasetê CHP û çepgirnê tirkan. Tazîye çîyêk o sîyaset yewna çî yo… Çar parçeyê Kurdîstanî destê dijminî de yî, ziwanê ma beno vîndî, Roja ziwanê kirdkî ya labelê medya di derdê ma Manîsa yo. Key seba Kurdistan kuçeyan pirr nêkenî, ino zor ro mi şino. şima venên senîn a

  4. Ewro êndî Tirkîya de herçî sîyaset ser ro êno qesey kerdene û çihêyf o ke sîyasetê de pakî kî çîn o. Yane sîyasetê de zaf qilerin êno kerdene.

    Nika mi derheqê CHP de heyanî nika zaf rêy fikrê xo ard ra ziwan û nusna. Ez bi kilmek naye vacî,çimê mi de CHP û MHP juyê. Miletê manê Kirmancî CHP dest xelê ont û hona-hona kî oncenê. Ma çepkiranê tirkan ra kî xêr nêdî. Xortanê ma înan re xêle xizmete kerde, hona hona kî kenê. Xortanê ma seba înan kî canê xo feda kerd, lê înan seba ma bêçikê de xo nêlewne. Ma kam re berbayme kam re nêberbayme, lê kes halê ma re nêberba.

    Çar parçeyê Kurdistanî ra, ju-di parçeyan meseleya xo hal kerda. Lê Tirkîya de na mesela hona halnêbîya. Çareser bîyena na mesela kî ez vana rêyna kurdan dest dera, o kî jubîyena kurdan hona çîn a.

    Derheqê ziwanê ma kirmanckî (zazakî) de kî xora hona xêle problemê ma estê.Helbet derdê mano tewr muhim ziwanê ma wo. Heyan ke ziwanê ma ranêxelesîya, ma nêşîkî me est bîyena xo ra qesey bikerîme.

Comments are closed.