Viraştoxê telefonanê destan Nokîa qerar de ke êndî telefonanê xo de sîstemê xo ney, wa sîstemê fîrmaya çîynermanê komputure Mîcrosoftî “Windows Phone” bixebitno. Hêvîya her di şîrketan a ke na hemkarîye ra feyde bivejê.
Nokîa pîyaseya telefonanê destan de ke nê telefonî jê (sey) “smartphone” (telefono biaqil) name benê û jê (sey) komputura qijkeke gureyenê, duştê reqibê xo Apple bi iPhone û sîstemê reqibê bînî Google Android de koto bin û xeylê zerar kerdîbî. Heta nika Nokîa sîstemê xo Symbîan gurenaybî ke pisporan ra gore bîyo kan. Nokîa ra gore sîstem hîna do destek bicêro, labelê nika ra Mîcrosoft û Nokîa do pîya sîstemê Windows Phone ser o bigureyê.
Tecrubeyê Nokîa dîzayn û viraştişê telefonan de û aye ra kî dot eyarkerdişê zonan (ziwanan) de esto. Yê Mîcrosoftî kî motorê cigêrayîşî Bîng û xizmetê xerîtayan esto ke faydeyê înan zaf o. Herçiqas ke rotişê telefonanê Nokîa de problem esto, şîrket hîna viraştoxo tewr girs ê telefonanê destan o. Serra 2012 de Mîcrosoft û Nokîa wazenê ke pîya telefonêde newe bivejê. No reqabetê pîyaseya telefonanê destan tenêna keno pêt.
