Vizêr merasîmê pîrozkerdişê newroze yê Hasekê (Rojawan) de di bombayî teqayî. Sey netîce tewr tay 42 kesî ameyî kiştene, dorê 150 kesî kî bîyî dirbetin.
Teqayîşo verên dorê saeta 18:00 de taxa Muftî ya Hasekê, verê Banê TEV-DEM de qewimîya. Uca bi seyan kesî seba pîrozkerdişê newroze amebîyî têlewe. Teqayîşo dîyin bombaya erebe bîye ke verê ofîsê PDK-S de teqaya.
Çeteyan newroze de domanî kiştî
Merde û dirbetinî desinde ameyî berdene nêweşxaneyanê cîya-cîyayan. Mabênê merdeyan de xeylê doman û cinîyî estê. Heta nika nasnameyê 37 merdeyan ameyî eşkera kerdene. Hûmara qetî ya merde û dirbetinan hîna bellî nîya.
Hetê kantonanê Kurdîstanê Rojawanî ra ame dayene zanayene ke hêriş hetê çeteyanê terorîstanê “Dewleta Îslamî” ra ame kerdene. Vilaweka kantonan de hêriş ame şermezar kerdene. “Semedê nê hêrişê ke şikîyayîşê çeteyan cebheyanê Til Hemîs û Til Berak ra tepîya ame kerdene, bi desan sîvîlan ke newroz pîroz kerdêne, kewtî şehîd. Bi seyan kî bîyî dirbetinî. Ma sey Koordînasyonê Pêroyî yê Kantonanê Rojawanî nê hêrişê wehşî şermezar kenîme.” Seba merdeyanê hêrişî hîrê rojî şîn ame îlan kerdene.
Herêma Kurdîstanî: Ma ardim rusnenîme dirbetinan
Sekreterê Pêroyî yê MY Ban Kî-Moonî kî hêriş şermezar kerd va ke “No hêrişo qefçil wextê roşanî de ke cematê kurdî yenê têlewe û hêvîya serra newîye pare kenê, o wext ame kerdene.”
Hêriş ra dime, hukmatê Herêma Federal a Kurdîstanî ardimê xo pêşkêş kerd. “Ma xo amadekar kenîme ke derman û gonî pêşkêşê dirbetinan bikerîme”, hetê Wezaretê Weşîye ra ame dayene zanayene.
Gonîwerê meret cejna ma zî kenî şîn û şiware lakîn ala kurda qet nêna war!