Ma ke bêveng vinderîme Parka Gola Çetû binê awan de manena. Dewlata bêbexte nafa kî  çimê xo virdê ra zîyar û dîyaranê ma. Armancê nînan baraj û maraj viraştene nîya, armancê nînan talan û weran kerdena, xan û xirabe kerdena. Sentral û mentralan bahane kenê.

Bi serrano ke welatê ma, bawerîya ma, kulturê ma, zonê ma, zîyar û dîyarê ma, dar û berê ma talan kerdî, vêşnayî, bombe kerdî şenik nîyo nafa kî Gola Çetû talan kenê?

Ma hêyan ke dest û payanê nîna meşiknîme, nê kî dest û payanê xo welatê ma ra, zîyar û dîyaranê ma ra, coxrafya ya ma ra û Parka Gola Çetû ra nêoncenê.

Tawa dest û payê xayin û bêbextan ver de vindene. Vaştê ra nafa kî Gola Çetû de, bi kêyf ê xo cîrît erzenê. Beledîya ya Dêrsîmî edi Parka Gola Çetû de xêyle xizmete kerda, der û dormê na parke de xêyle dar û ber no ro û na ca kerdo zê cehenetî.  Ewro kî bêbextî  vaştêra nê cehenetî çarnenê ra cehenemî. Nê bêbextan nafakî ver çarno ra baweriya qizilbaşan, ver çarno ra zîyar û dîyaranê qizilbaşan, ver çarno ra coxrafya ya qizilbaşan…

N` ero no welatê ma talanê pîye şima no?

N` ero şima, ma de dawa çinayî kenê?

N` ero na Gola Çetû warê pîye şima wa ya kî  talanê pîye şima wa?

N` ero şima zanê Dêrsim warê bav û kalê kamî yo?

Dêrsim warê bav û kalê ma no.

Dêrsim bajarê de bi nam û şan o. Welatê de bi reng û veng o. Dêrsim bi namê xo, bi tarixê xo, bi kulturê xo, bi kamîya xo, bi zîyar û dîyaranê xo, bi coxrafya ya xo ya rengeyîne welatê de hêca wo. Welatê de bi qedr û qiymetin o. Tarixê Dêrsîmî bi gonîya şehîdanê ma amo nusnayene.

N` ero şima zanê dêrsimijî  seba kamîya xo, seba welatê xo, seba pîr û rayberanê xo, seba zîyar û dîyaranê xo çand rêy canê xo feda kerd, çand rêy  adir û kile de vêşayî, çand rêy amayî kîştene?

N`ero ma  şima nêzanê bi qehremanîyênî ya Sêyîd Rizayî, Alîşer Efendî û Zarife Xanime, Mazlum Doğan, Zîlan û Sakîne Cansize… Dêrsimî nam do welatan?

Eke nêzanê, o taw nayê rind bizanê ke Dêrsim bajarê de namdar o. Her bosta hardê Dêrsîm de gonîya şehîdanê ma gonya şarê kirmancî rişîya. Coka Dêrsîm bi tarixê xo, bi coxrafya xoya rengeyîne zerêye ma de cayê de muhim cêno.

Ha, naye kî caran xo vîra mekerê, Dêrsîm, welatê şêran o, welatê qerehmanan o, welatê şehîdan o, welatê zîyar û dîyaran o.

Koyê Duzgin Bavayî vana vêrena ra bawo. Mi gonîya xo de linganê to ra kerdê Duzgin Bava, qey nîya bêvenga? Çemê Munzirî, Xanê Xizirî, xas û ewlîya yî şima qey nîya bêven mendê?

Ma, gelê way û birayan, şima qey nîya bêveng mendê? Berêne Dêrsim re û Gola Çetû re wayîr vecîme!!!

Wusêne Gestemerde

Berlin, 03.07.2013

4 ŞÎROVEYÎ

  1. Problemê Kurdî û bitaybetî Dêrsim zoro. Çike hina xoser nî, bine bandira ju dewletake înan hata nika asîmîle kerdo û keno. Hata ke kurdî dewleta xo nenora, her serre kulturê, sîyaseta, îtîqatê înu goyn dana, asîmîle bena. Qayite Kurdîstanê Basur kerime, uskade endî cenc erebkî nizenone, îtîqate her kesi, azado. Kesîk endî newano ke, zone înu, îtîqate inu yeno xirawinkerdis. Endî uskadê ju konseptê heyat esto, reflex û reaksîyon meste de mend. Uskade endî însan zerreye heyate kurdî dere.

    Nika Dersimizî wesiya xo çutir ramene? Xeyleye înu komelê elewîyandere, yani Cemevi, nameyê xo tirkîyo, ebe xok tirkîyo. Elewîye Dersimizî birene, vane “Ötekilesmeyecegiz” temam slogane rindo, labelê xeleto. Ebe Cemevi îtîqatê mayo ke ma Pîr û kalîkune xora musayme, no Cemevinde yeno xiravin kerdis, asimîle kerdis. Yani Cemevinde însanê ma yene “Ötekileskerdene” 🙂 yanî ju bezanayiso ke amo sare ye û mezgeye ma pilosnene, hona besenibenoke birabo. Lao ziwane to beno vînd, to kuna Cemevi hata pisewe kilame tirki vana û tepîya dewletera vana, ney ti mi besenikena asîmîle bike. Dewletek sabena, aq zonana ke nî xo ebe deste xo asîmîle kene. Jiyar û dîyare ma birez Gestemerde umre înude nîyo. Gagane nîya reaktîyon dane, temam…

    Yanî ma gerekeke endî heyate xoye kurdî birameme, itîqate xo, zone xo, harde xo, ziyare xo deste tirkan ra bixelesnime. Hata ke no nebi, niya heyat ebe protesto, reaksiyon ra vereno. Endi waxt waxte wesiyayisa heyate mayo, protesto dae niyard, neano. Dêrsiminfo ju parçeye no heyato, na game gerekeke her cade bierzîyo. Caye îtîqat te, sîyasette, kultur de, wendegehî de, yanî her cade.

    Be kirmanckî zîyarî nebeno,
    Îtîkqat nebeno, eke bîyene Yahudî k îtîqate xo tirkî kerdene…
    Be kirmamnckî sores nebeno, sosyalîzm nebeno, eke bîyene Lenîn kitabane xo tirkî nusnene
    Be kirmanckî Xizir qayirino, Duzgi Bawa qarino, Sey Riza û Sey Seid qarîno…
    Be kirmanckî sehîde ma qarine..l

  2. Meymanê Wusarî, derheqê elewîyanê ma de, ez heqe dana to. Bawerîya ma qizilbaşanê kurdan de hard o dewreş û asmên o kesk, zîyar û dîyarî, awe û adir, roj û aşme, pîr û rayber… zaf cayê de muhim cenê.

    Ewro şarê ma bawerîya xo, zon û kulturê xo êşto hetê, binê portreya dişmenê xo Atatürk de û binê ala dişmenê xo de îbatetê xo hemî kî bi zonê tirkî ramen o.

    Ewro çi hêyf ke şarê ma cemxanan de, hem hetê zon ra hem kî hetê bawerîye ra asîmîle beno.

    Ez hertim naye vana, gere êndî şarê ma cuya (heyetê) xo bi zonê dayika xo kirmanckî
    (zazakî) biramo. Zonê dayika xo, xo re qible bicero.

    Lê to bê bi dîyar ke cayê zê Dêrsim de û cayanê bînan de şarê ma hona nakê xo zonê tirkî ra nêvisno.

    Werhasil no derheq de problemê ma zafê û gere ma nê probleman ser o vinderîme.

  3. Sare Kırmance Elewi xu kerdo vinde kute dime tirkî, sanke marîfeto rindo xo kerde tîrk.
    Kata şerkene pere vana ma tîrkura rajîme, kimance Şafîra ma tey ju nîme, tîrk mara weşe.
    Nu mantık zaf neweşo. Asîmîlasîona tîrk ma ker kud, ma xayale xorîde cıwiyayenme.
    Weşîyede bimane

  4. Eylas bira,

    raştîkî şarê ma xo mîyan de bîyo lete lete. O wo ke kewto ra tirkî dime, o wo ke kewto ra tirkmenan dime, o wo ke kewto ra ereban dime… Ma kam re vacîme, kamrê nêvacîme. Nêtawremê ke kes ra çîye kî vacerîme.

    Her kesî ju raye şana re xo ver û şono. Na rewşe kî qet rinde nîya.Vace wa Xizir êndî xêre ra çarno.

Comments are closed.