New çekdarê HPG (Hêzên Parastina Gel, yanî Hêzê Seveknayîşê Şarî) ke hewteyo verên Pervarî (yê Sêrt) de merdîbî roja 05.07.2010 Mazgêrd de dewa Kîrzî de defn bîy. Pervarî de pêrodayîş de hîrê eskerî û hîrê qorîcîyî amey bî kiştene.

HPG ra dêrsimije Eylem Demîrpençe ameye wedardene, endamê partîya BDP ya Dêrsim, Amed, Xarpêt, Sêrt, wekîlê Dêrsimî Serafettîn Halîs, sereka beledîya Edîbe Şahîn û hezar kesan ra zêde kî tey bîy. Bi di seyan tomofîl û otobusî a roje amey dewa Kîrzî. Maya Eyleme xo da tabute ser û bi (ebe) berbayîş kurdkî şîyare vate, “Cana mi, cana mi, kamî ke to vesnaya, ey kî biveso.” Tabute hetê cinîyanê dewe ra ame ardene heta goristan.

Wekîlê Dêrsimî yê BDP noca (naza) de qeseyê xoyo kilmî de va ke, “Vengdayîşê ma yê aştîye bênetîce mend. 26 serrî yê ke rojhelat ra rojawanê nê welatî de dayîkî berbenê. Ewro kî dewlete no herb nêvindernena. Destê ma yê aştîye û dîyayîşê heqî na dewlete betal kerdî. Eke destê ma hewa de nêverdayêne, ma ewro no dej nêantêne (nêontene).”

Seba ke meyîtê Eyleme parçe-parçe bîyo û ameyo veşnayayene, waştişê may û waya xo ke rîyê Eyleme bivînê, nêame qebulkerdene. No semed ra tabute nêameye rakerdene. Tabuta Eyleme bi (ebe) vîlikanê kesk, zerd û sûrî neqişîyaybî. Maya xo tabute ser o şîyare va, “Oxir bo, çêna (kêna) mi, oxir bo. Çimanê to peyser de nêmanê, pêro hevalê to îta (tîya) r’ ê.”