Fînalê Lîgê Şampîyonan ke 24. gulane Lîsabon de ca cêno, beno derbîyê şaristanî: Real Madrîd ra dime nika Atletîco Madrîdî nêmfînal xo rê girewt.
Ekîbo favorî Atletîcoyî vizêr bi 3:1 duştê FC Chelsea de kewt ser. Nîya 40 serran de reya verên a ke Atletîco yeno fînalê lîgê tewr muhîm ê Ewropa. Reqibo hemşehrî Real roja dişemîye FC Bayern Munîhî bi 4:0 û şerm nêmfînal ra eştîbî. Fînalê 24. gulane de ekîbê Dîego Sîmeoneyî duştê ekîbê qiralan Real Madrîdî de kay keno: no tarîxê futbolê Ewropa de çîyêde newe yo.
Kayê Atletîcoyî çîp û pêt vêrdîbî ra: Adrîán López (dq. 44.), Dîego Costa (dq. 60. bi penaltîya faulî) û Arda Turanî (dq. 72) Londra Stamford Brîdge de golê serkewtişî eştîbîy. Nîya Atletîco Madrîdî bê ke reyê bin kewo, reşt fînalê lîgî. “Bawerîya ma bi xo ma rê raye kerde ra, wa golê reqipan bierzîyo kî”, kaptan Tîagoyî va. “Ma do keyfê naye bivînîme.”
FC Chelsea destpêkê maçî de (dq. 36) bi golê Fernando Torresî şî ver, la reya hîrêyine nêmfînalê Lîgê Şampîyonan ra vejîya. Maç çîp bî, la zêde heyecan tey çin bî. Her di ekîbî kaykerdişo lez ser o konsantre bîy, la kesî nêtawrayêne ke bi rîzîko kay bikero.
