Goreyê xebera DÎHA ra, Dêrsim de 21 qereqolê neweyî yenê viraştene. Ewro Dêrsim de 5.000 ra zêde eskerî wezîfe der ê, hûmara qereqolanê ke nika estê, kî 58 a.
Mektuba Wezîrê Asayîşê Milî Îsmet Yilmazî de ke 14. çele de cewabê parlamenterê CHP Huseyîn Aygunî daybî, nê reqemî amey nuştene. Naye ra gore 5.000 hezarî ra zêde eskerê pisporî Dêrsim de wezîfe der ê: nika 21 qereqolî zêdek yenê ser. Nê qereqolî newela Pilemurîye de virazîne, nînan ra 16 teneyî benê qereqolê mobîlî. Xora, 58 qereqolî falîyetî der ê.
Par ameybî ceribnayene ke Koyê Zelî ser o yew qereqol bêro viraştene, la şar û hêzanê HPG virênîye ro ci girewtîbî. Nika goreyê xeberanê dewijan ra Koyê Zelî ser o awanî û kar bi dozeran dewam benê. Yew qereqolo mobîl kî nêzdîyê zîyaretê dewa Paxî ya Mamekîye de virazîno.
Viraştiş hetê dewijan ra giran rexne beno. Goreyê fikrê cayîyan ra dewe de qeroqolî lazim nîyê, ê tena welat kenê hepisxane. Xeylê şiwanî kî rîyê qereqolan ra besenêkenê ke biresê waranê xo ke mal biçerîyê. Ser o kî cayê qereqolî cayêde bimbarek o, seba dêrsimijan îbadetxane yo. Awankerdişê qereqolan sey usûlê talkerdişî yeno dîyene.
Persê dêrsimijan ser o, Mudirîya Birrî ya Dêrsimî kerd eşkera ke ê seba viraştişê qereqolan destûr kî da ci. Wezîfedarê Midurîya Birrî ya Xarpêtî, Muhîttîn Ozbeyî, naye ser o nîya qisey kerd: “Ma rê seba awanîyan muracetî amey. Ma kî seba viraştiş destûr da ci. Ma destûr danîme ci ke nê birran de seba xeyrê pêroyîye banî bivirazîyê.”
