Badê ke Ferhat Tunç jê (sey) wekîlê Dêrsimî nêameyo weçînitene, Dêrsim de salonêde bi 3.000 goşdaran ame pêser. Ferhat Tunçî raver ra esnafê Mamekîye zîyaret kerd û înan de qisey kerd. Pêserameyîş de kî sereka beledîyaya Dêrsimî Edîbe Şahîn, serekê BDP ê Dêrsimî Suat Demîr û xeylê destekkerdoxê Tunçî bîy.

Ferhat Tunçî qiseykerdişê xo de da zanayene ke zîyaretê xo ra dime dîyo dêrsimijî weçînitiş ra tepîya poşman ê ke ray day partîya CHP. Tunçî goşdarî baldar kerd ke Dêrsim de propagandayade girane ameye viraştene ke Kiliçdaroglu bêro weçînitene. No semed ra xeylê dêrsimijan rayê xo day CHP.

Ferhat Tunçî boyna va ke xeylê sosyalîstî û endamanê blokî kî rayê xo day CHP. Vatişê Tunçî ra gore BDP xo ra qederî cayê ra rayî nêgirewtî, eskerî, sosyalîst, hetta weçînitoxanê MHP û AKP rayê xo na fay zêderî day CHP.

“Ma rayê xo ke raver ra girewtîbî, rind seveknay. Labelê ma bi (ebe) ju (yew) blok kotîme weçînitene. Çi heyf o ke endamê blokî Dêrsim de duştê ma de gureyay. Heto bîn ra kî AKP û MHP ra xeylê rayî şîy CHP. MHP raver ra 3.000 rayî girewtîbî, na rey tena 900, yanî 2.100 rayî MHP ra şîy CHP. Bêbextîya tewr girse înan kerde ke xo ra çepgir û sosyalîst vanê, bi kampanyaya boykotî rayê xo berdî day CHP. Ez no netîce ser o zaf bîyo mirozin. Labelê ma vînenîme ke şarê Dêrsimî kî pê no skor qayîl nîyo.”

Ferhat Tunçî ser o vindet ke çar wekîlê BDP şaristananê bînan de amey weçînitene, labelê Dêrsim de ju (yew) wekîl nêame weçînitiş. “Kamer Genç û kesê nîyanênî Dêrsim temsîl nêkenê. Şarê Dêrsimî naye qebul nêkeno. No weçînitiş de ne Kamer Genç ne kî Huseyîn Aygun ke bi operasyonêde şewe CHP ra namzed bîy, reqibê ma bîy, reqibê ma tena Kiliçdaroglu bî. Ma roja tenge de leyê şarê xo de bîyîme, canê xo daybî û nika kî leyê şarê xo de manenîme. Ez henî bawer keno ke şarê Dêrsim qîymetê domananê xo ke Dêrsim bi tarîx, îtîqad û kulturê xo temsîl kenê, zaneno. Ma no weçînitiş kerd vîndî, labelê Dêrsim ney.”

2 ŞÎROVEYÎ

  1. Dersimijî weçînitiş ra dima poşman bîyî watene xo xapînayene û ju tewir xo tesellikerdene yo. Beno ke Dersimijî Ferhat Tunc ra hes bikeri la tercîhê xoyê sîyasî CHP yo, çi ra? No gerek rind bêro tehlîlkerdene.

  2. Weçinis rindo rind niyo, nizonon. Mira gore parlamentoye Tirkiyade kurdi besenikene heqa xo bicero. Njya yaki hen, sare Dersimiz wekike xo ser qerar do. Gerekeke herkes ney qebul kero u seba ameyoxi nikara plan u proje bivirazo ke, reyna partiye tirki Dersim de niya welenge mekere. Ferhat Tunc vanoke 2 asme kampanya wecinisi kerda. No qe beno? Gerekeke mordem nikara wecinisi wedarizye u bini, biguriyo. 

Comments are closed.