Şewe
giran-giran şaristanî gêna binê hukmê xo
û sixletîya kuçeyanê Beyogluyî bêvinetiş xo bi xo koçena.
sura şewe ya honike yena
û tenik-tenik xemgînîya rîyê ma lesena.
Ez û ti
yew masa de, têduşt de
verê ma de çaya qaçaxa boyeweşe
weledana verê ma de cixarayê ma yê tutinî dû kenê
û bêvengîya ma…
Sura şewe ya honike yena
û porê to yo derg û nerm sura vayî reyde reqesîyeno
zereyê mi de cemedê hezar serran helîyeno
dima
ewnîyayîşê to bi hesrete pilosîyeno mi ra
ewnîyayîşê to de
ez vêşananîya xo ya bi serran lownena
û newe ra mi ra boya şitê zerrîye yeno.
