Bi rojan o ke ma zulm û zordarîya ke bi êzîdîyan yeno kerdene, qetlîamo ke bi êzîdîyan ame kerdene, ma kî medya û medya sosyale de teqîb kenîme. La bi senî hal û bi senî qeyde teqîb kenîme, ju Heq zano, ju kî ma zanîme.
Gelê miletê êzîdîyan, gelê way û birayan, ez kî ewro êzîdî ya. Ez kî sey şima her roje mirena. Ez kî zaf xemgin a. Ez kî sey şima berbena. Ez kî sey şima nalena û kalena. Ez kî sey şima birîndar û birînkul a. Ê mi kî sey şima bîrîn û kulê mi jan danê. Ê mi kî zereyê mi domananê şima rê veşeno, ê mi kî kal û pîranê şima rê, azeb û xortanê şima rê, dayîk û bawikanê şima rê, ê mi kî zereyê mi zaf hem kî zaf veşeno.
Raştî kî nê zulmê zulmkaran ver wîjdanê mi çizeno. Rîyê ma nêcêno ke ma qayîtê rîyê şima kerîme. Ma êndî însanetîya xo ra şerm kenîme. Êndî însanetîye binê linganê bê wîjdan û bê merhametan der a. Êndî însanetîye binê linganê bê dîn û bê îmanan der a. Êndî însanetîye binê linganê bê şeref û bê namusanê DÎÎŞ der a. Nê bêşeref û bênamusî bi nameyê Heqî însananê bêsuc û bêgunayan qetl kenê.
Qasê miletê êzîdîyan masum, qasê miletê êzîdîyan feqîr, qasê miletê êzîdîyan bêkes û bêku ju milet çin o. Kesî de pêrodayîş de nîyê, kesî de dewaya heq û huqûqî de nîyê, kesî ra miradayîş nîyê, bi her miletî aşt û yar ê. Mordem tewr nêzano ke serê hardanê na dinya ra ya estê ya kî çin ê. Hênî ke bêveng û hênî ke sukut ê. Caran zerarê xo kesî nêreşto.
Ewro her go juyê êzîdîyan nişto re cayê. Nufusê xo honde çin o. Bawer bike ke êzîdîyî bi bêçikan yenê mordene. Êzîdîyî tewr zaf şaristanê Îraqî Mûsil de weşîya xo ramenê. Êyê bînî kî tayê xo Îran der ê, tayê xo Sûrîye der ê, tayê xo Armenîstan der ê, tayê xo Rûsya der ê, tayê xo Tirkîya der ê û tayê xo kî Ewropa der ê.
Ewro qetlîamê êzîdîyan rê dînya bêveng menda û goş no re xo ser. No qetlîamo ke hetê terorîst û minafiqanê DÎÎŞ ra amo kerdene, raştî kî nê qetlîam rê her kes bêveng mendo. Însanetîye binê lingan der a. Hetanî çi taw dest û payan kenîme xo ver, cayê xo de nîya sukut nişenîme ro û wahşetê nê terorîst û minafiqanê DÎÎŞ temaşe kenîme?
Serê hardanê na dinya ra kesî qasê miletê êzîdîyan cefa û belengazîye nêante. Feqirîye û hesîrîya na dinya ti vanê para şima êzîdîyan rê kewtê.
Ewro halo ke êzîdîyî tede r’ ê, mordem nê zulmî zon ardene rê çekuyan nêvîneno. Bi zav û zêçe xo çol û çolistan de vêşan û têşan ê. Zav û zêçê xo têşanîye ver helak şîyo û hetê ra kî hetê terorîst û minafiqanê DÎÎŞ ra yenê kiştene. Nê weqetê nîyanênî çimanê ma ver de benê. Ma kî nîya bêveng qayît beme. Ewro êndî roja jubîyena kurdan a, roja jubîyena elewîyan a, roja jubîyena êzîdîyan a, roja jubîyena armenîyan a, roja jubîyena suryanîyan a… Gere verba nê cisnê şeytanê DÎÎŞ de qewetê xo ju kerone û aje re nînan bibirnê.
Ez kî ewro birînkul a, ez kî ewro birîndar a, ez kî ewro têşan a, ez kî ewro vêşan a, ez kî ewro bi canê xo, bi royê xo koyanê Şengalî der a, ez kî ewro êzîdî ya.
