Eşîra jirkan Colemêrg û Şirnex de 30 serrî vera PKK de dana pêro. Labelê na eşîre êndî wazena ke pêrodayîş biqedêno. Serekê jirkan Mehmet Adîyamanî va ke “Naye ra tepîya êndî (êdî) ma qet ju (yew) qersune cêncanê kurdan nêerzenîme.” Adîyamanî da zanayene ke ê êndî operasyonan nêşonê û çekanê xo kî caverdenê.
Di aşmeyî benê ke 168 endamê eşîra jirkan çekî caverday û qoricîyanê bînan kî qerar girewt ke operasyon mêşêrê. Serekê eşîra jirkan no qerar ser o vat ke “Ma bi PKK 30 serrî danîme pêro. Sebebê nê pêrodayîşî ra ma dewanê xo ra bîyîme. Ma jubînî (yewbînan) ra bi seyan kesî kiştî. Beno ke her serre ma 50 cêncî kiştî, labelê înan ver a 3.000 cêncê neweyî amey. Na mesele bîye girse. No yeno ra a mane ke na mesele bi (ebe) çekan hel nêbena. Gerek ke na mesele serê masa de munaqeşe bibo. Gerek na mesele şarê kurdî ra pîya qisey bibo. Eke no proses tenêna bibo girs, êndî kes besenêkeno ke duştê ney de bivejîyo. Naye ra kî tirkî bi zerar vejînê.”
Adîyaman vat ke êndî dewlete gama aştîye bierzo. “Qerarê aştîye ya kî yê herbî nika ra tepîya pîyê mi Tahîr Adîyaman ney, ez cêna. Ma de xeylê qorîcî estê, hama ma êndî qerar girewt ke naye ra tepîya ju (yew) qersune nêerzenîme. Waştena ma axir aştî ya. Na rişîyayîşê gonî êndî bivindo. Hukmat êndî gama xo bierzo. Ma êndî operasyonan nêvejîme.”
Şaristananê Kurdîstanî de hewteyanê vêrenan de xeylê qorîcîyan çekê xo caverday.
