Çarçewaya protestoyanê mektebanê Tirkîya de seba ke bi kurdkî perwerdeyo resmî çin o, xeylê cayanê Kurdîstanê Vakurî de çalakîyî amey viraştene. Dêrsim de dersa kirmanckî teber ra ameye dayene.
Rêxistina Qezaya Dêrsimî ya DBP bi sloganê “Ma heqê pewerdeyê bi ziwanê dayîke wazenîme” venga boykotê mekteban dabî. Boykot hîna dewam keno. Taxê Gazikî yê Mamekîye de xeylê xortî amey têlewe ke muhîmîya ziwanê dayîke bimusnê. No merasîm de yew û nêm saete dersa kirmanckî ameye viraştene. Derse teber ra hetê Dibistana Hurrîyetî de ameye dayene. Hemserekê DBP yê Dêrsimî Ergîn Dogru kî beşdarê derse bî. Malime perwerdekare Tulin Atmaca bîye ke derse yew texteyê nuştişî ser o daye, Mewzûyê derse alfaba, hûmarnameyî, çekuyî, dîyalogo rojane ûsn. bîy. Derse bi çepikanê wendekaran qedîyaye.
