Bi munasebetê serrgêra 18. ya qetlîamê Sêwasî xeylê elewîyî vejîyay kuçeyan ke hem qurbananê qirkerdişê Sêwasî yad bikerê hem kî sucdarê ke heta nika hepis de nîyê, protesto bikerê.
Emser protesto virênî de problematîk vêrd ra, çike polîs nêverda ke şar bêro verê Otelê Madimakî ke tede 18 serran ra ver 37 însanî amey veşnayene. Coka protestokerdoxî û polîs kot tê, polîs bi jop û gazo bîberin hêrişê mîtîngdaran kerd. Jê (sey) netîce xeylê kesî bîy dirbetinî.
Şodir ra xeylê protestokerdoxî Dîyarbekir, Îstanbul, Îzmîr û şaristananê bînan ra amey Sêwas. Erebeyê înan hetê polîsî ra amey kontrol kerdene. Tayê pankartî kî amey top kerdene.
Sireyo ke nameyê însanan ke 18 serran ra ver amey veşnayene amey wendene, polîsî gazo bîberin eşt zereyê grûba însanan. Na esna de werteyê mîtîngdar û polîsî de pêrodayîş vejîya. Tayê protestokerdoxî bîy dirbetinî. No hêriş ra tepîya mîtîng bi beşdarîya xeylê hezaran kesî dewam kerd. Seba ke polîs nêverda ke milet bireso verê Otelê Madimakî, tayê cêncan kemer û şuşeyî eştî polîs.
varnide hemmeçi dı ez şımara vono merheba. embazın