Viraştişê awbendan û HES Newala Mizurî de protesto bîy.
Awbendê ke Parko Milî yê Newala Mizurî de do bêrê viraştene, hetê dêrsimijan ra amey protesto kerdene. Protestokerdoxan hetê Çemê Mizurî de yew rêzila însanan viraşte, sloganî amey eştene.
Planan ra gore Çemê Mizurî ser o yew baraj bi nameyê Konaktepe û di Santralê Hîdroelektrîkî (HES) do bêrê viraştene. Lîsansê viraştişî 2010 de şîrketê Elektrik Üretim A.Ş. rê ameybî dayene. Seba vindernayîşê lîsansan hetê Komela Seveknayîşê Mîrasê Tebîet û Kulturî ra dewa ameybî rakerdene. Qeraro vêren ê dadgehe ra gore viraştişê awbendan xeyrê qanûnî bîy û ameybî vindernayene. Labelê îtîrazê şîrketê barajî ser o 2011 de Wezîrîya Dorûver û Birran da zanayene ke projeyê HES seba îhtîyacê enerjî yê şarî zarûrî yê, coka seba awankerdişê awbendan lîsanso newe ameybî dayene.
No qerar hetê şar û rêxistananê sîvîlan ra nika ame protesto kerdene. Tayê protestokerdoxan bi pankartan qeraro verên ê dadgehe daran ser o aliqna, rêzila însanan viraşte. Hetê Federasyonê Komelanê Dêrsimî (DEDEF) ra serekê heyetê îdareyî Alî Riza Bîlîr, serekê Tum Bel Sen Mazlum Dogan, Endamê Meclisê Qeza Derman Taranci û Ardimkerdoxê Serekîya Beledîya yê Pulurî Hasan Geçgînî da zanayene ê têde heqanê xo yê demokratîkan duştê viraştişê awbendan de do bixebitnê.
