Serekwezîrê Ísraîlî Sîmon Peres Waşîngtin de bi serekkomarê DYA Barack Obamayî de ame têlewe û Amerîka ra seba Kurdîstanê Başûrî piştgirîye waşte. Peresî ard ziwan ke kurdan nika ra dewletêda xosere naye ro û reyna yewbîyayîşê Îraqî bi qaneatê ey ra meydan nêno.

Peresî Sarayê Sipî de Obamayî rê kerem kerd ke DYA piştîya kurdan bidê. Xebera rojnameyê Îsraîlî Haaretz ra gore Peresî va ke mesela Îraqî êdî bîya vila û ancîya awankerdişê dewletêda yewbîyayeyî nêbeno. Bi îxracatê petrolî kî Tirkîya naye qebul kerd. Peresî ra gore gerek DYA xoserîya dewleta Kurdîstanî rê destek bidê.

Roja panşemîye wezîrê karanê teberî yê Îsraîlî Avîgdor Lîebermanî kî Parîs de nîşan da ke Îsraîl do Kurdîstano xoser qebul bikero. Parîs de Lîberman bi hemkarê xo John Kerry de ame têlewe. Kombîyayîşê çar saetan de yew mewzû kî rewşa Îraqî bîye. Dima, spîkerê Lîebermanî da zanayene ke “Îraq verê çimanê ma de beno lete, coka dewleta xoser ê kurdan awan bena”