Dêrsimijan no hewte reya 5. çalakîya roniştişî kerde qurbanê qetlîamê Gavanê Zînî yad kerdî.

Rojnameyê Dêrsimî, Komela Dormeyê Mizurî, Înîsîyatîfê Seyîd Rizayî û komelanê bînan ê dêrsimijan hewteyo 5. taxa Îstanbulî Galatasaray de çalakîya roniştişî viraşte ke bala rayaumûmî biancê jenosîdê Dêrsimî, bitaybetî qirkerdişê Zînî ser. No mîtîng de beşdaran waşt ke “Gerek dewlete resmî ozrê dêrsimijan biwazo, gerek cayê mezelanê Seyîd Riza û hevalanê ey eşkera bê.”

Armanco bingeyin ê na çalakîye yadkerdişê 95 qurbananê Zînî bî. 6. tebaxe 1938 de dewanê sînorê Dêrsim-Erzinganî ra dorê 95 dewijî amey pêser ardene berdene kampê dewa Kiliçkaya. Wexto ke dewijî amey vîyarnayene Gavanê Zînî ra, uca de amey qir kerdene. Êyê ke weş mendîbî, surgun bîyê bi Balikesîr û Edîrne. Nê weşmendeyan ra yewê Canpolat Yakar û Seyfî Kiliçkayayî ke kalikê xo no qetlîam de qir bîyo, qirkerdişê Zînî ra 75 serrî ra dime Serdozgerîya Komar a Erzinganî de dewa taleb kerde. Dozger Mehmet Can Mihçî ke mewzû de eleqedar bîbî, verê cendirme rê nuşte rusna ke estbîyayîşê kommezela Zînî tespit bikero. Labelê 19 rojan ra dime cigêrayîşê dozgerîye semedê kêmasîya delîlan ra ame vindernayene.

Coka dêrsimijî amey têlewe ke sîyasetê Komara Tirkîya derheqê tarîxê xo de protesto bikerê. Ekrem Yeterî ke bi nameyê rêxistinanê Dêrsimî ra qisey kerd, derheqê qirkerdişê Gavanê Zînî de va ke “No ne qeydanê resmîyan de vîyareno ne kî kitabanê tarîxî de. (…) Heta ke waştişê ma ke pêro hetê qetlamî eşkara bibê, nêno ca, ma teklîfkerdişê tezmînatî kî, (…) qebul nêkenîme.” Yeterî va ke çalakîyî do heta 4. gulane biramê. “Heta ke waştişê ma qebul nêbenê, ma mucadeleyê xo kenîme daha pêt.”

Yeterî ra gore waştişê dêrsimijan nê yê:

  • Dewlete bi tewirêde resmî ozrê dêrsimijan biwazo.
  • Pêro arşîvê dewlete rabibê.
  • Nameyê kanî ê dew û zîyaran bêrê peyser dayene.
  • Lîsteya têde domanan ke çêyanê (keyeyanê) xo ra amey remnayene, eşkera bibo.
  • Cayê mezela Seyîd Riza û hevalanê xo eşkera bibo.
  • Surgunê Dêrsimî hardê xo peyser bicêrê.
  • Polîtîkaya awbendan bivindo.
  • Sîyasetê asîmîlasyon û înkarî biqedîyo.