Mintiqaya dewa Pulurî Cemalîye (bi tirkî: Çakmaklı) de yew heşe û di leyîrê aye hetê seydwanan ra amey kiştene. No serebût mabênê aktîvîstanê tebîetî yê dêrsimijan de ame şermezar kerdene.

Nê rojanê peyênan de dewa Cemalîye ya Pulurî de leşê yew heşe û di leyîranê ci amey dîyene. Henî aseno ke heşe pey de vindeta ke leyîranê xo bisevekno. Seba ke vewre emser rew varaye, vanê qey heşî nêzdîyê yew aşme vêşan bîy.

No derheq de Aktîvîstanê Tebîetî yê Mizurî yew vilaweke neşr kerde. Tede bêrêzîya seydwanan duştê hemsencîya tebîetî de şermezar kenê vanê ke “Nê belengaz ê ke eleqeya înan bi etîkê seyd û seydwanîye çin a, xo seydwanî zanenê û qedîyayîş[ê tebîetî] her roje kenê tenêna çîp. Nê (…) seba keyfê xo nanê candaranê Dêrsimî ra.

Ana Fatma, zewt dayo biza kirre ke şit kerdîbî ro. Demê ra dime, wexto ke na biza kirre bena hedefê yew seydwanî, ma Anafatma wîjdanê xo ra nêva ke ‘Ya Xizir, waştena mi a ya ke no erd ser o kes seydê bizanê kirran nêkero’?

Ma maseyê sûrî yê Mizurî seba hezaran serrî bimbarek nêbîyêne? Serra 2012 de qetlkerdişo tewr girs ê zerencan ê tarîx bî (…). Ma ke heqê weşîye yê her candarî seveknenê, nê qetilî heqê kiştişî kotî ra cênê? Ê yê ke hende curetkar ê ke her hewte yew biza kirre kişenê! (…)

Tebîet de her çî girêdayeyê yewbînan o. (…) Ti ke naye cêra kena, na hemsencîye kena têbin û têser o. Ha na yo ke seydwanê neberpirîsyarî kenê.

Şima qet fikirîyayê, nê heşî çayê zimistanan hewn a nêşonê? (…) Verê cû, nê erdî hende dewletî bîy ke her candar mird bîyêne. (…) Labelê şima naye şikna. Maseyê ke şima çin kerdê, pezkovîyê ke şima pira na, parçeyê naye bîy. Qersunanê şima heşî tersnay. (…) Nika newalan ra vengê vêşanîya heşan yeno. (…) No zimistan seba heşan zaf çetin vêreno ra. Zafê înan, seba ke weş bimanê, leyîranê xo wenê. “