Dêrsim de mîtîngê îtîqad û zonî (ziwanî)

1
366

Dêrsim de xeylê hezarî kesî binê parolayê “Her tewir asîmîlasyon rê ney” amey pêser û hurmetkarîya îtîqadê xo waşt.

Dêrsim Mamekîye Meydanê Seyîd Rizayî de partîyê sîyasî û dêrsimijan pêserameyîş verba rêxistinê cematî û dersa mecburî ya dînî viraşt. Wekîlê Dêrsimî yê BDP, sereka beledîya Edîbe Şahîn, hunermendî Ferhat Tunç û Metîn Kahraman û dorê 8.000 kesî cayê mîtîngî de duştê asîmîlasyonê îtîqadê Dêrsimî de amey pêser. Şodir ra pêro qezayanê Dêrsimî ra milet ame Mamekîye. Xeylê mîtîngdarî kincê tradîsyonelî yê Dêrsimî kerdî pay û protestoyê xo kî bi kilaman kerd.

Beşdarî raver ra bi pankartêde girs “Dersa mecburî ya dînî wedarîyo, perwerdeyê zonê (ziwanê) ma bêro” heta Meydanê Seyîd Rizayî peya amey. Mîtîng de komîteyê viraştoxan ra M. Alî Şahîn nîya qisey kerd: “Terîqetê Gulenî wazeno ke îtîqadê Dêrsimî asîmîle bikero, wazenê ke bi wendegeh û unîversîteyan no proje îmkananê dewlete ra bivirazê. Her kes bizano ke şarê Dêrsimî sereyê (sareyê) xo duştê asîmîlasyonê zon (ziwan) û îtîqadê xo de darîno we.”

Naye ra tepîya Edîbe Şahîn qiseykerdişê xo de nê mewzûyan ser o vindet: “1938 de Mezgêrd de pêro merdimî (mordemî) ameybî qir kerdene, no semed ra cinîkan serekîya îtîqadî girewte xo ser. Ma nêwazenîme ke dewlete ma rê dersa dînî bido. Şarê Dêrsimî 90% îtîqadê Dêrsimî ra yo, labelê şaristanê ma de hîrê camîyî estê. Ma rê dersa dînî memusnê, ma îtîqadê şima nêwazenîme. Çike îbadetê ma zîyaran (jîyaran) ra, çemê Mizurî ra yo. Şima bi awbendan îtîqadê ma kenê xirabin, êndî (êdî) destanê xo îtîqadê ma ra biancê (bioncê), no ma rê bes o.”

Dima, wekîlê Dêrsimî Şerafettîn Halîsî qisey kerd va ke “Dêrsim de sîstemê qirkerdişî 1938 de besenêkerd ke ma biqedêno, badêna 1980 ra tepîya her dewe ma rê waşt ke camîyan bivirazê ke ma bikerê sunî. No plan kî nêgureya. Peynîye de AKP ke şarê kurdan rê ‘Ju (yew) zon (ziwan), ju (yew) ala û ju (yew) milet’ bi zor ra dana qebul kerdene, bena jê (sey) Tunîs. Êndî perwerdeyê zonê (ziwanê) ma serbest bo û îtîqadê ma ser o asîmîlasyon wedarîyo.”

Qiseykerdiş ra tepîya Ferhat Tunç û Metîn Kahramanî bi kirmanckî û kurmanckî kilamî vatî.

1 ŞÎROVE

  1. Niajni destene tore lew ken ke ti niya pet tornune xore rayberan kena. Her kes bizono ke sare Dersim zone xoye delali kirmancki u kirdaski kes nidano. No sar endi amo xoser, endi zone xode qisey keno u qimete itiqate xo zoneno. Zof sabine na xebere ser.

Comments are closed.