Qezaya Dêrsimî Pilemurîye nêzdîyê dewa Pintige de yew (ju) vergî perra dewijî ser. No hêriş de di dewijî bîy dirbetinî. Vergo hêrişkar hetê dewijanê bînan bi (ebe) tifong ame kiştene.
Dewij Alî Şahîn (66 serre der o) û Kîymet Şahîn (65 serre der a) verê banê (bonê) xo de niştêne ro, destê saeta 20:00 de xafil de vergî eşt înan ser. Verg verê perra rîyê Alî Şahînî ser û o kerd dirbetin. Dima cinîya Alî Şahînî ke waşt mêrdeyê xo vergî ra bixelesno, bi xo rastê hêrişî bîya. Dirbetê Alî Şahînî giran o. Vengdayîşê dewijan ser o dewijê bînî amey reştî verê banî û verg rema şî.
Alî Şahîn û Kîymet Şahîn amey berdene bi nêweşxaneyê Erzinganî. Kîymet Şahîn cêra şî dewe, Alî Şahîn hîna nêweşxane der o.
Dewijan peşewe verg saye kerd, labelê besenêkerd ke rêça ey doz bikerê. Wextê şodirî de no verg na ray hêrişê şiwaneyî bi (ebe) nameyê Îsmet Bozkurtî kerd. Îsmet Bozkirik bî dirbetin û ame berdene bi nêweşxaneyê Erzinganî. Naye ra tepîya no verg hetê lajê Alî Şahînî Cebraîl Şahîn ra ame kiştene.
