Çalakîya Dêrsimî de ke her hewte roja şemîye seba “Vîrameyîş û Vîrardiş” yena viraştene, no hewte çalakîkerî seba yadkerdişê qirkerdişê Dêrsimî yê 1938 amey pêser û saeta 19:38 de tam 38 deqayî çalakîya roniştişî kerd.

Dêrsim de seba yadkerdiş û vîrardişê qirkerdişê 1938 roja şemîye saeta 19:38 de 38 deqayî çalakîya roniştişî ameye kerdene. Baroyê Dêrsimî, Şubeyê ÎHD ê Dêrsimî û Komela Dêrsimî ya Bawerîya Elewîyan û Akademîya Kulturî (DAKAD) no aksîyon parka Seyîd Rizayî de viraşt.

Park de temsîlkarê partîyanê sîyasî û ê rêxistananê sîvîlan û xeylê dêrsimijî verê qama Seyîd Rizayî de amey pêser. Pêserameyîş de ame waştene ke jenosîdê Dêrsimî resmî bêro nas û qebul kerdene. Waştişê bînî ke pankartan ser o nusîyaybî, nê bîy: “Dewlete seba jenosîdê Dêrsimî ef biwazo. Arşîvê Dêrsimî bêrê rakerdene. Nasnameyê ke mabênê 1937-38 û 2007 de bîyê vîndî û cayê înan bêrê eşkera kerdene, meyîtî kî teslîm bê bi nasanê xo. Sucê ke wextê OHAL de duştê însanîye de amey kerdene, bêrê persayene, bêrê eşkera kerdene.”

Wextê çalakîya roniştişî de sloganî jê (sey) “Dewleta qetile do hesabê xo bido” û “Faîlî bêrê dîyene, hesab bêro pers kerdene” amey eştene. Verê heykelê Seyîd Rizayî de miletî seba yadkerdişê merdeyanê qirkerdişê Dêrsimî mumî fiştê ra ci.