Xebera tayê ajansan ra gore cinîya vîyaye ya Muammer Kaddafî nêzdî de şona Kurdîstanê Başûrî. Na mesele ser o sermîyananê başûrî dest bi aranjman kerd.

Kanalê televîzyonî kurdî NRT da zanayene ke Celal Talabanî wazeno ke cinîya Kaddafî bêro Kurdîstan, çike weşîya xo de Kaddafî xeylê destek da şarê kurdan. Ame vatene ke Kaddafî “bi çekan piştîya (poştîya) kurdan da û seba heqê tayînkerdişê qederê kurdan her ca destekê xo eşkera kerd.”

Xanima Kaddafî Safîya bi çênaya (kênaya) xo Ayşa û di lajî Muamed û Hanîbal aşma tebaxe de îltîca kerdîbî bi Cezayîr. Safîya Kaddafî 40 serrî cinîya serekê Lîbya bî. Tayê texmînan ra gore dewlemendîya xoya taybetî dorê 30 mîlyar Dollarî ya. A Kaddafî de serra 1971 de zewijîya, maya ju (yew) çêna (kêna) û hewt lajan a.

Serekkomaro kan yê Lîbya Kaddafî 20. oktobre de şaristanê Sîrte de kotîbî destê serewedaritoxan û ameybî kiştene.