Sîyasetkar û nuştoxo kurd Kemal Burkay ke peynîya aşma verêne de cêraybî ra welatê xo, serekê beledîya Dîyarbekirî Osman Baydemîr zîyaret kerd. No pêserameyîş de Burkayî zon (ziwan) û sîyasetê hukmatê Tirkîya giran rexne kerd. Burkayî kî da zanayene ke gerek şaro kurd pîya bo û jubînî (yewbînan) ra hurmet bimuso.

Osman Baydemirî Burkay bi kurdkî selam kerd û xeyrameyîş bi kurdkî va. Baydemîrî da zanayene ke o zaf şa beno ke Burkay 31 serran ra tepîya cêra ra ameyo welatê xo. Qiseykerdişê xo de ey va, “Waştişê min o ke rojê kurdê jê (sey) şima ke xeribîye de hesretê welatê xo ancenê (oncenê), resenê welatê xo. Seba naye aştîyêde şerefî bêro viraştene. Seba na aştîye kî gerek ma pêro pîya bigurîyîme.”

Baydemîrî ra dime Kemal Burkayî kî bi kurdkî qisey kerd, hîsê xo ard zon (ziwan) va ke o zaf zerrîweş o ke 31 serran ra dime Dîyarbekir der o. “Ez birêz Baydemîrî nas kena, zanena ke o serekêde xebatkar o ke şar û welatê xo rê xizmetêde girs keno. Dîyarbekiro newe zaf qayîlê mi şî. (…) Şima kî zanenê ke hîna gonîya domananê tirk û kurdan rişîna. Her di hetî êndî masayêda dîyalogî de na mesele hel bikerê. Zonê (ziwanê) hukmatî qet rind nîyo, gerek no hukmat fek zonêde (ziwanêde) hêrişkar ra verade û ro çareserîye bicêrê.”