Maratonê şaristanê DYA Bostonî de roja 16.04.2013 de di bombayî teqay, hîrê kesan canê xo day, 140 ra zêde dirbetin ê. 

Di bombayî dorê saeta 14:45 (21:45 Kurdîstan) de têdima 100 metreyî nêzdîyê xêzê fînîşî de teqayî. O wext de hîna atletan vaştêne. Teqayîşan ra dime pêro ca kewt kaos û panîk, televîzyonan de merdim resimê dû û duman, gonî û remê însanan dî.

Hîrê kesî merdî, goreyê xebera ajansan tede kî yew domano hewtserre ke xêzê fînîşî de pawibê pîyê xo bî. Da-140 însanî kî bîy dirbetin, nînan ra 17 rewşa krîtîke der ê. Tayê kesan rîyê teqayîşî ra dest û payê xo kerdî vîndî. Goreyê melumatan ra dina bombayî pîstê musabeqe ser o amey dîyene ke nêteqay. Polîsî ê îmha kerd.

Hîna bellî nîyo ke kamî no înfaz kerd. Ame dayene zanayene ke heta nika di teorîya otorîteyan estê: 1. no yew înfazê grûbêda zereyê DYA bî ke duştê hukmatî der a. 2. No yew înfaz bî ke hetê îslamîstanê radîkalan ra ame viraştene. Çapemenîya DYA de heta nika teorîya yewine ser o hîna konsantre bena. Vanê ke plankerdişê înfazê bombayan profesyonel bî, labelê tayê bombayî nêteqay. Eke biteqayêne, hîna zêde kesî bimerdêne. Aye ra kî dot, roja dişemîye eyaletê Massachussets de Partiot’s Day (Roja Neteweperweran) pîroz bîye ke cengê serbestîye yad kena.

Maratonê Bostonî maratono tewr kano serrane yê dinya yo ke 1897 ra bi nat yeno viraştene. Dorê 20.000 kesî beşdarê nê maratonî benê, bi se hezaran seyrkerdoxî kî.