Bankayê Federal ê Rezervî yê DYA (FED) 22. hezîrane ra tepîya do programê xoyo dîyin ê piştîdayîşê pîyaseyê ekonomî û fînansî (QE 2.0) biqedêno. Ekspertê fînansî henî bawer kenê ke 22. hezîrane ra tepîya, ya kî tayê rojî raver ra, borsayê Amerîka do bikuyê tengasîye.

Pisporanê bankayê Swîsî “Julius Bär” raporo xoyo peyên de na babete ser o analîzê xo nîya viraşt: seba ke sermayegozaran aşmanê peyênan de xeylê kaxidê rîzîkoyinî kerdî depoyanê xo, nê pozîsyonê rîzîkoyinî şikînê her game bêrê teqayene. No kî beno sebebê rotişo total. Heto bîn ra pozîsyonê kilmî (îngilizkî: short position) Dollar ser o benê zêde. Bi nê pozîsyonan sermayegozarî îddîa kenê ke erja Dollarî bêro war. No semed ra xeylê sermayegozarî nika ra goreyê fîyato ameyox Dollar herînenê. Aye ra îndeksê senedanê hîsseyan şonê devacêr (efektê heşî). Coka kî xeylê sermayegozarî pereyê xo kenê aksîyonan ya kî emlakan. Pereyo newe û teze no taw pîyase de nêno dîyene. No rî ra pisporî henî vanê ke borsayî nêzdî de bi îhtîmalêde girs do biginê war ro.

Tesîrê erdlerzê Japonya û rewşa hesas a ekonomîya dinya katalîzatorê bîn ê ke raverşîyayîşê borsayan ser o tesîrêde negatîf danê. Pêsermayîşê FED de eşkera bî ke DYA êndî pîyaseya fînsanî de aksîyonanê neweyan nêherînenê. Ekspertê fînansî no qerar ser o durumê borsa tenêna rind vînenê.