Ax Kobanê
Kobanê ewro bi derd û bi keder a
Kobanê ewro birîndar û birînkul a
Kobanê ewro binê top û tankan der a
Kobanê ewro şîn û şîwan der a
Ax Kobanê ax…
Ma kî bi can û bi royê xo leweyê Kobanê der îme. Kobanê teyna nîya û terorîstanê “Dewleta Îslamî” (DÎ/DAÎŞ) dest kî nêkuna. Bi rojan o ke verba çeteyanê terorîstan de xoverdayîşê Kobanê bi hêz û qewetêde hewl dewam keno. Raştî kî qic ra pîlanê Kobanê verba nê terorîstan de bi can û bi royê xo mucadelêde hewl kerde û hona kî no xoverdayîşê Kobanê dewam keno.
Ewro hona hîrê hetê Kobanê binê hêrişê çeteyanê DÎ der ê. Ewro hona Kobanê ser o mij û duman darîno we. Ewro hona domanê Kobanê binê vengê top û tifengan de benê heşar. Ewro hona Kobanê binê zulmê bêşeref, bênamus û bêwîjdanan der a.
Nê çeteyê û terorîstê DÎ ke bi destek û ardimanê hukmatê AKP û bi destekê serekkomarê dewleta Tirkîya Tayyîp Erdoganî yê, gere ke koke re nê terorîstanê DÎ bibirîyo. Na dinya de cayê nê bêbext û nê xayînan çin o. Ê kesê ke destek û ardiman danê nê terorîstan, na dinya de înan rê kî ca çin o.
Her çî eşkera yo, her çî aseno û her kes kî rind zaneno ke hukmatê AKP û dîktator Erdogan ardim danê nê terorîstanê DÎ (DAÎŞ). Ewro nê terorîstê DAÎŞ-MAÎŞ hetê dewleta tirke ra, hetê dîktator Erdoganî ra, hetê tayê dewletanê zê Tirkîya ra û hetê zê pîyanê Erdogan ra vecîyay no werte. Seke ardî werte, henî kî virane ser o ardê pê, destek da ci, nê terorîstî êndî Tirkîya de perwerde kerdî, bi kamyonan çek, bomba, tank û topî day ra dest û ewro kî miletê feqir û fuqarî ser zulm kenê û feqîr û fuqareyî sare birnenê.
Verba terorîstanê Erdoganî de, yanî verba terorîstanê DÎ de gere kurdî hêz û qewetê xo, fikr û ramanê xo, plan û programê xo, ray û rêça xo ju bikerê. Ewro êndî roja jubîyen a, ewro êndî roja xoverdayîşî ya, ewro êndî roja doşdayena doşî ya, ewro êndî destê jumînî pêt pêgûretan a.
Ewro dezgeh û partîyê kurdan, hêze sîyasî û hêze sîvîlî, yanî kurdî pêro pîya gere îradeya xo werte bikerê û verba dişmenê xo yê bêbext û xayînî de, verba terorîst û çeteyanê DÎ de bibone ju girmike, bibone ju qewet, bibone ju can ke wa dest û payan re terorîstanê DÎ bişikno û dolimêna kî wa nê çeteyî hêrişê Kobanê, hêrişê feqîr û fuqareyî mekerê. Hem dersêda rinde bidîyo nê terorîstan û hem kî dersêda rinde kî bidîyo kesanê ke destek danê nê çeteyan, wa bidîyo nê kesan.
Wa biciwîyo xoverdayîşê Kobanê! Ma bi can û royê xo leweyê Kobanê der îme û Kobanê teyna nîya.
