Peynîya aşma êlule ra bi nat Kanton û şaristanê Kobanê yê Kurdîstanê Rojawanî de hêzê kurdî duştê hêrişê rêxistina terorîste “Dewleta Îslamî (DÎ)” de xo ver danê. Çimê kurdan û yê dinya xoverdayîşê Kobanê ser o yê. Serebûtê cengê xoverdayîşî bi teferuat na meqale de ca cênê (rd.).

Sêşeme, 21.10.2014

10:00: Roja 36. yê xoverrodayîşê Kobanê de yeno dîyene ke zafêrîya şaristanî semedê bombardumanê hewayî, top, tank û bombayê DÎ û tabî pêrpdayîşan ra êdî rijîya nêna xebitnayene. Bitaybetî rojhelatê şaristanî bî xan-xirabe. Melumatanê YPG ra gore hema-hema her banî zerar dî. Banê ke cebheyî der ê, dêsê înan amey neqirnayene ke mabênê banan de korîdoran bivirazîyê. Pêro wasitayê şaristanî kî bîbî hedefê mermî û şarapnelan.

YPG ra gore wasitayanê DÎ ke bi tonan bomba bar kerde û hetê hêzanê YPG ra amey çin kerdene, zerarêde girs da şaristan. Nê wasitayan ra tewr tay 10 heban hêrişê Kobanê kerd. Cayo ke nê wasitayî teqayî, dormeyê 100 metreyan de her dês û ban rijîya, rayî û meydanî bîy xirabin. Yeno vatene ke terorîstan xeylê banan sey taktîk rijnenê.

Dişeme, 20.10.2014

23:00: Xebera SOHR ra gore, çeteyanê DÎ newe ra hêrişê Kobanê kerd. Di hêrişanê întîharî ra dime ke vakurê şaristanî de ca girewt, cebheyan de ancîya pêrodayîşî vejîyay. Peşewe xeylê bombardumanî û pêrodayîşî estbîy.

12:00: Hukmatê Tirkîya destûr da ci ke pêşmergeyan rê yew korîdor bi Kobanê rabibo. No hetê wezîrê karanê teberî yê Tirkîya Mewlid Çavuşogluyî ra tesdiq bî. Pêşmergeyî erdê Tirkîya ra vîyarenê Kobanê ke dest bidê çekdaranê YPG. Çimeyanê Rûdawî ra gore kî, serekê Herêma Federal a Kurdîstan Mesûd Barzanî no plan serekê PYD Salîh Muslîmî ra pîya ard ca. Muslîm hewteyo peyên Duhok de bî.

10:00: Xebera AME Press ra gore cebheyî hîna zaf nêvurîyay: zafê cayanê Kobanê destê DÎ der ê. Naye ra pîya Twîtter ra yew resim pare bî ke qaşo sînoranê cebheyî musneno:

09:00: Vilaweka CENTCOM ra heta ewro gore duştê terorîstanê DÎ de pêro pîya 135 hêrişê hewayî estbîy. Nînan ra des teneyî peynîya hewteyî de bîy. Nê bombakerdişan de vanê bi seyan çeteyê DÎ amey kiştene, xeylê mewzî û malzemeyî kî amey îmha kerdene.

08:00: Goreyê xebera CENTCOM ra Amerîka Kurdîstanê Başûrî ra pê teyarayan 17 tonî çek, teqemenî û malzemeyê eskerî rusnay. Na reya verên a ke hêzê DYA û mutefiqê xo bombarduman ra teber kî ardim rusnenê. Heta ewro dewleta Tirkîya qebul nêkerd ke korîdorê hetkarîye rabibo. Analîstan ra gore bi bombakerdiş û nika ardimê çekan ê Amerîka planê Tirkîya ke Kobanê mêro xelisnayene, beno xirab.

Hêzê DYA çend reyî hewa ra çek, teqemenî, derman û malzeme nêzdîyê Kobanê de ard war ke biresê destê YPG. Çekî kî Herêma Kurdîstanî ra amey. Herêma Federal a Kurdîstanî çekê ke pêşmergeyan girewtîbî, pê teyarayanê C-130 yê DYA da rusnayene bi Kobanê. “Na mesela şerefê welatî yo”, Rûdaw ra gore yew fermandarê pêşmergeyan va. Vilaweka Serekîya Herême de kî yena nuştene ke: “Na hetkarîya leşkerîye ke Kobanê rê ameye rusnayene, nameyê pêro Kurdîstan û Herêma Kurdîstanî de bîye.”

 


 
06:00: Peynîya hewteyî de xeylê melumatî amey Kobanê ra: roja panşemîye ra bi nat YPG ra yeno dayene zanayene ke tena %20 yê Kobanê destê DÎ der ê. Roja şemîye de merkez û rojhelatê Kobanê de pêrodayîşê giranî dewam benê. Dorê 35-40 topê DÎ şaristan de teqay. Texmîn beno ke zafêrîya şaristanî ameye rijnayene. Vakurê rojhelatî de DÎ tayê mewzîyê xo kerd vîndî. Tayê melumatan ra gore DÎ çarşeme ra bi nat wazena Reqqa, Daîr as-Saûr, Carabulûs û Mandîc ra cengdaranê neweyan bîyaro Kobanê.

Îne, 17.10.2014

18:00: Melumatan ra gore, herçiqas de DÎ xo tenê peyser anto, xeylê cayanê şaristanî de -merkez tede- pêrodayîşê giranî dewam benê. Hêzanê YPG başûrê rojawanî de di rayîrê serekeyî ard kontrolê xo, labelê peynîya cengî hîna dûrî ya.

16:00: Xebera ANF ra gore înîsîyatîf êdî destê YPG der o. Bitaybetî taxê Kaniya Kurda de operasyonê duştê DÎ de dewam benê.

13:00: Goreyê melumatanê SOHR ra beno ke destê DÎ de hîrê teyarayê cengî kî estê. Pîlotî hetê efseranê kanan ê Sedam Huseyînî ra perwerde benê. Na xebere ra gore teyarayî produktê urisî MiG 21 û 23 ê ke vakurê Halebî meydanê teyara yê artêşa Sûrîye de amey dîyene. Tewr tay yew teyara ameye dîyene ke nizm meydan ser o firaya. Eke melumatî rast ê yan ney ya kî eke DÎ wayîra roketanê teyarayan a zî, hîna bellî nîyo.

10:00: Rojnamegera almana Natalîe Amîrî ke sînor der a, vana ke ewro hal zaf sakîn o. Bêvengîya nîyanêne raver ra çin bîye.

01:00: Fermandarê YPG Mehmûd Berxwedanî da zanayene ke yew aşme xoverdayîş ra tepîya hêzê YPG giran-giran şonê raver. “Bitaybetî no hewte DÎ rê bî goristan. Nika her ban û her kuçe de cendegê çeteyan estê. Nê rojanê peyênan de ma her hîrê cebheyan de raver şîy. Her roje ma çeteyan kişenîme û çekanê giranan danîme arê. Çekê tewr giranî yê DÎ amey çin kerdene, her hîrê cebheyan de operasyonê pakkerdişê amey kerdene.”

Panşeme, 16.10.2014

19:00: CENTCOM ra gore çarşeme û panşeme 14 operasyonê hewayî estbîy: hedefê pêrune zere û teberê Kobanê bîy. “Hêrişan bi serkewtîye da 19 banê DÎ, di mezîyê komandoyî, hîrê mewzîyê çekdaran û hîrê mewzîyê nîşandaran, yew mewzîya sabîte û yew çeka girana otomatîke ro”, vilaweka CENTCOM de nusîya. Ame dayene zanayene ke operasyonê hewayî raverşîyayîşê DÎ kerd tenêna giran, la halê asayîşî Kobanê de hîna sivik o.

18:00: Yew meqala rojnameyê îngilizî BBC de fermandare Baharîn Kandal neql bena. Kandal telefon de BBC de qisey kerd va ke çekdaranê DÎ xo xeylê cayê şaristanî ra peyser ant, tena di parçeyî rojhelatê şaristanî de mendî. Hêrişê hewayî yê DYA zaf tesîrdar bîy. Hêvîya Kandal a ke Kobanê nêzdî de ancîya bena azad.

Melumatanê Kandal ra gore YPG çek, malzeme û çekdarê neweyî girewtî, la Kandal îzeh nêkerd çitur girewt.

17:00: Xebera Rûdawî ra gore da-2.000 multecîyî resay Herêma Federal a Kurdîstanî. UNHCR ra gore nînan ra 459 kesî şonê kampê Kawargoskî nêzdîyê Hewlêrî, 1.400 kesî kî kampanê başûrê Silêmenî de manenê. Bi her pêlê multecîyan kapasîteya Herême bena pirre. Wextê cengê zereyî yê Sûrîye de pêro pîya 220.000 bextwaştoxî amey Herêma Kurdîstanî, wextê hêrişê DÎ Mûsil û Şingal de kî xeylê kurdî remay ke Herême de sitare bivînê. Pêro pîya Kurdîstanê Başûrî de no taw 1,4 mîlyonî multecîyî estê.

14:00: Esnafê Pilemurîye seba piştgirîya Kobanê kepenkê xo kerdî ca. Çalakîya esnafanê Pirdê Sûrî yew roje dewam kena.

13:00: Pêrodayîşî hîna benê giran. Çapemenîya mîyanneteweyî ra yena dayene zanayene ke DÎ xo tayê taxan ra peyser anto, la nika ceribneno ke hêrişanê xo dewam bikero. Bitaybetî cebheyanê rojhelat û başûrê rojhelatî yê Kobanê hêzê YPG ceribnenê ke terorîstan şaristan ra bierzê. Îdrîs Nasanî ra gore YPG rê hîna zaf çek û mermî lazim ê. 

09:00: Xebera ANF ra gore semedê hêrişanê DÎ ra Kobanê de hîrê nêweşxane êdî nênê xebitnayene. Her roje bi desan kesî benê dirbetinî, şaristan de kî tena çar doktorî estê. Hîrê nêweşan ra yewê sîvîl, doktor Welat Xelîl Omer vano, zafê îman kokim, cinî ya kî doman ê. Aye ra kî dot kêmasîya dermanan esta. 

Seba ke hewa bî tenêna serd û însanî zaf werd nêvînenê, nêweşî benê zêde. Omer: “Ma tîya tena cengdaranê dirbetinan tedawî nêkenîme, şarê sîvîlî ra kî nêweşê ma zaf ê. Çi ke destebera yeno, ma kenîme. Xeylê nêweşî ma ra nan wazenê, labelê şansê ma çin o ke ma rastê naye bêrîme. Ma tena besekenîme dirbetanê basîtan mudaxele bikerîme.”  

Omerî da zanayene ke tengasîya tewr girse cadayîşê keyberê sînorî hetê dewleta Tirkîya ra yo. “Seba ke sînor cadîyaye bî, des kesî rîyê vîndîkerdişê gonî ra merde. Nînan ra şeş cengdarê YPG/YPJ bî, di cengdarê Artêşa Azad a Sûrîye ra, di kî sîvîl bîy. Dirbetê înan giran bîy û ma mecbur mendî ke înan emelîyat bikerîme. La înan dorê panc saetan verê keyberê sînorî de vindet. Peynîye de nê hevalê ma şehîd bîy.”

01:00: Serekê Herêma Federal a Kurdîstanî Mesûd Barzanî Tirkîya rexne kerd. “Tirkîya welatêde muhîm o û besekena DYA ra pîya Kobanê biseveknê. Ez bawer kena ke DÎ tena seba kurdan ney, la seba asayîşê mîyanneteweyî texdîdê girs o. Gerek koordînasyon hîna pêt bibo ke çimeyê fînansmanî bêrê birnayene û terorîstî dîwelan ra mêrê Sûrîye û Îraq. Cengê duştê DÎ de bi hedefanê bînanê jeopolîtîkan ra têwerte mebo.”

Çarşeme, 15.10.2014

22:00: Operasyonê duştê DÎ de nika resmî nameyê “Operation Inherent Resolve” girewto. Nameyê ke sey “Operasyon Ezîmo Tebîî” ya kî “Operasyon Ezîmo Rastikên” tercume beno, Pentagonî roja çarşemîye beyan kerd. Vilaweka Pentagonî ra gore qerarê piranayîşê nameyî çend rojan ra ver ame girewtene.

17:00: Hemserekê PYD Salîh Muslîmî ra gore operasyonê hewayî yê koalîsyonî zaf tesîrdar ê, beno ke nêzdî de mizgîna raxelisîyayîşê Kobanê bêro. Badê kombîyayîşê xo bi serekê Herêma Federal a Kurdîstanî Mesûd Barzanî, Muslîmî rojnamegeran de qisey kerd. Muslîmî derheqê rewşa peyên a Kobanê de melumat da, boyna da zanayene ke îdîayê ke Kobanê de hêzanê bînanê kurdan rê destûrê pêrodayîşî çin o, xelet o. “Ma raya kesî nêbirnaye. Kam ke wazeno, besekeno Rojawan de ceng bikero. Kam ke wazeno xo bisevekno, kesî ra destûr nêcêno. Kam ke wazeno welatê xo bisevekno, kerem bikero ceng bikero.”  Muslîmî bale ante ser ke herb tena Kobanê de ney, la Serê Kani, Ceza û cebheyanê bînan de kî esto.  

14:00: Sîyasetmedarê almanî yê muhafezekar Volker Kauderî yew roportaj de va ke mumkîn o Almanya çekan birusno PKK. “Ez nêvana ma dest medîme grûbanê bînan. Labelê no duştê Tirkîya de ney, tena Tirkîya ra pîya beno. Piştîdayîşê PKK kî tena henî beno.” Kaudarî venga Anqara da ke prosesê aştîye bi PKK dewam bikero. “Bombakerdişê mewzîyanê PKK qebul nêbeno. Gerek ma zereyê NATOyî de no derheq de qisey bikerîme.”

12:00: Çimeyanê cîya-cîyayan ra gore çeteyê DÎ xo tenê peyser ancenê. Spîkerê Kobanê Îdrîs Nasanî ra gore, DÎ %20 yê kontrolê xo kerd vîndî. Goreyê Pentagonî ra semedê hêrişê hewayî ra “bi seyan” terorîstê DÎ amey kiştene. Stratejîya koalîsyonî tena Kobanê rê konsantre nêbena. Pentagon ra gore şaristan û dewê bînî kî binê texdîdê DÎ der ê. Pentagonî bale ante ser ke texdîd hîna esto ke DÎ Kobanê îşgal bikero. “Durumê cengî sey çem o, ge şono bota ge yeno nata.”

10:00: Hukmatê Sûrîye koalîsyonê duştê terorî de texdîd kerd va ke o destûr nêdano ke hêzê erdî yew mintiqaya tamponî Kurdîstanê Rojawanî de bivirazê. Xebere de ke hetê ajansê hukmatê Sûrîye Sana ra ameye vila kerdene, yeno vatene ke Şam bi hetkaranê xo do tedbîran bicêrê eke hêzê mîyanneteweyî kewenê Sûrîye. Fikrê mintiqaya tamponî hetê Tirkîya ra amebî. Fransa dest da ci, DYA û kurdî duştê nê fikrî der ê. Mutefiqê Sûrîye bitaybetî Îran û Rûsya yê.

09:00: YPG bîlançoyê xo yê xoverdayîşê Kobanê kerd eşkera. Xebere de ke ANF ser o neşr bîya, yeno vatene ke xoverdayîşê Kobanê reşt roja xo ya hîrisine. A aşme de heta nika 1.294 endamê DÎ amey kiştene, 10 tank û xeylê wasitayê eskerîyî amey îmha kerdene. Ser o kî xeylê malzemeyê eskerî kewtî destê YPG. Teferuatê bîlançoyî noca yenê wendene.

07:00: Spîkerê YPG Polat Canî tesdiq kerd ke bi koalîsyonê mîyanneteweyî hemkarîya resmîye esta. Canî ra gore merkezê fermandarî yê koalîsyonî de temsîlkarê YPG kî esto. Melumatê Canî ra gore YPG hem hetê îstîhbaratî ra hem eskerî hem kî meselanê hêrişanê hewayî de koalîsyon de hemkarîye kena. Naye ra gore yewîyêda YPG koordînatan dano koalîsyon, uca ra kî teyarayî rusnîyenê ke cayê koordînatan bomba bikerê. Boyna, ame dayene zanayene ke zereyê YPG de 5-6 cengdarê amerîkanî estê.

Mintiqayê Kobanê ke hetê YPG ra kontrol benê (seba girskerdiş bitiknê).
Mintiqayê Kobanê ke hetê YPG ra kontrol benê (seba girskerdiş bitiknê).

Sêşeme, 14.10.2014

20:00: Xebera BasNewsî ra gore Herêma Federal a Kurdîstanî pê teyarayan çek û malzemeyo eskerî rusnena Kobanê. Çimeyê BasNewsî va ke “Herêma Kurdîstanî Tirkîya ra destûr waşt ke korîdorêk seba rusnayîşê çekan rakero. Eke Tirkîya rusnayîşê çekan qebul nêkena, Herêma pê teyarayan çek û îhtîcayo eskerî rusnena cengdaranê kurdan ê şaristanê Kobanê.” Eynî dem de serekê Herêma Kurdîstanî Mesûd Barzanî va ke “Çîyo ke ma seba Hewlêr kerd, ma seba Kobanê kî kerd. Ma hewarkerdişê Kobanê îxmal nêkerd. Demo ke ez vînena ke dormeyê şaristanêde kurd ame girewtene û ez besenêkena tebayê bikerî, zerrîya mi bena parçe-parçe.”

19:00: Hemserekê HDP Selahettîn Demîrtaşî kombîyayîşê grûbe de qisey kerd, hukmatê Tirkîya rexne kerd. “Ma şima ra nêva ke wa şêrê Kobanê de herb bikerê. Sînor rakerê, bi des hezaran xortî estê, şonê uca înan [çeteyanê DÎ] tuyê xo de xeneqnenê. Labelê nêverdanê. (…) Kamo ke cêreno şima ver, sey şima beno bêbext. Ma sîyasetê şima yê bêbextî ra şermayenîme. Bi sanika birayîye ke şima ma rê 100 serrî qal kenê, ma pê şermayenîme.”

18:00: Ajansê Enerjî yê Mîyanneteweyî (ÎEA) raporê xo yê aşmane de da zanayene ke semedê hêrişanê bomba yê koalîsyonê DYA ra vetişê petrolî yê terorîstanê “Dewleta Îslamî” (DÎ) bî kêmî. ÎEA ra gore no taw roje de 20.000 varîlî petrol yenê vetene, raver ra na hûmare 70.000 varîlî bîye. Nîya qeçexçîya petrolî ya DÎ 30.000 varîlan ra kewte 10.000 varîlî. Îdxalatê petrolî seba DÎ çimeyê fînansmanî yo zaf muhîm bî. Hêrişan ra ver, pisporan texmîn kerd ke DÎ bi rotişê petrolî roje de 3 mîlyon Dollarî pere qezenc kerd.

16:00: Serekkomarê Fransa Fançoîs Hollandeyî venga Tirkîya da ke sînorê Kobanê rakero. “Gerek Tirkîya sînorê xo rakero ke kurdanê Sûrîye rê ardim bêro”, Hollandeyî Parîs de va. Heta nika hukmatê Tirkîya hîna destûr nêdano ke malzeme ya kî kurdê cengdarî bivîyarê Kobanê.

15:00: Rojnamgero alman Dîrk Emmerîch ke sînor ra pê Twîtter xeber dano, vano ke mermîyê YPG ha benê kêmî. Emmerîchî va ke ey bi cengdaran telefon de qisey kerd, naye ra gore YPG rê lezgîn îkmal lazim o. Aye ra kî dot dermanî kî qet nêmend. Melumatê YPG ra gore, tena tayê antîbîotîkî destê înan der ê, sewbîna derman qedîya.

14:00: Goreyê raporê kovara “Middle East Review of International Affairs” (Merîa) fotografî vejîyay ke musnenê ke DÎ çekanê kîmyewîyan duştê kurdan de xebitna. Fotografî aşma temmuze ra yê. Pisporê kîmya yê Îsraîlî kovare de va ke beno ke gazê xerdelî yo. Seba ispatkerdiş gerek merdim cigêrayîşan biramo. Bi texmînê Merîa çekê kîmyewî aşma hezîrane de, badê îşgalkerdişê şaristanê Îraqî Mutanna kewtî destê çeteyanê DÎ.

13:00: CENTCOM ra gore dişeme û sêseme pêro pîya 21 hêrişê hewayî virazîyay. Bi vatena şahîdanê ke sînor de pawenê, bitaybetî peşewe xeylê bombardumanî estbîy. Henî zaf bîy ke merdimî besenêkerd hêrişan bihûmaro. Serekê beledîyaya Kobanê Enwer Muslîmî kî da zanayene ke hêrişê koalîsyonî bi hemkarîya hêzanê kurdan beno. Nîya YPG besekerd ke DÎ rojawan de 4 km peyser bierzê. CENTCOM ra gore kî bi bombakerdişê koalîsyonî raverşîyayîşê DÎ tenêna ame vindernayene.

12:00: Yew vîdeo de ke Facebookî ser o pare bî, cengdarê YPG vanê ke ê yew hêrişê întîharî yê DÎ hetê înan ra ame vindarnayene.

 

11:00: Wezîrê karanê teberî yê Brîtanya Phîlîp Hammondî da zanayene ke welatê xo kurdan duştê terorîstanê DÎ de tena nêverdanê. Hammond ke bi serekê Herêma Federal a Kurdîstanî Mesûd Barzanî de amebî têlewe, qiseykerdişê xo de va ke “Ez tîya ra wazena ke ancîya eşkera bikerî ke ma kesî cengê duştê terorîzmî de tena nêverdanîme. Ma ardimê xo hem eskerî hem kî însanî dewam kenîme.”

10:00: Goreyê xebera Ara Newsî ra teyarayê koalîsyonê DYA nika rojane derûdorê Kobanê bomba kenê. Aye ra ver hewte de tena her 2-3 roje hêrişê hewayî estbîy. Ancîya tena bi hêrişê hewayî problem çareser nêbeno. Çeteyê DÎ qijkek û çîp ê, cayê înan leze yenê vurnayene, ban û malezemeyê înan êdî nimite yê. 

09:00: Xebera Rûdawî ra gore Parlamentoyê Herêma Federal a Kurdîstanî de ewro mewzû Kobanê yo. Hewteyo peyên heyetê des parlamenteranê Herême şîbî Kobanê û Suruç û derheqê multecîyan de rapor amade kerd. Kombîyayîşê parlamentoyî de temsîlkarê Miletanê Yewbîyayeyan (MY) ê Îraqî Nîkolay Mladenovî kî beşdar beno. 

Yewna mewzûyê kombîyayîşî qebulkerdişo resmî yê kantonê Kobanê yo. 

08:00: Xebera ANF ra gore cengdarê YPG alaya DÎ ke serê tumê Kaniya Kurdan de estbîye, arde war. Her hîrê cebheyî, rojawan, rojhelat û başûrê Kobanê de, pêrodayîşî bi şidet dewam benê. YPG ra gore rojhelat de xeylê terorîstê Dî merdî, rojawan de kî dewa Til Şeîr ame pak kerdene. Bombardumanê koalîsyonê DYA hîna dewam beno.

Tumê Til Şaîrî ke nika ancîya destê YPG der o.
Tumê Til Şaîrî ke nika ancîya destê YPG der o.

Dişeme, 13.10.2014

21:00: Keyepelê CENTCOM (Komandoyê Merkezî yê DYA) de nusîno ke hêzanê DYA û mutefîqanê xo çar hêrişê bombayî başûrê rojawanî yê Kobanê de kerdî. Nê bombakerdişî de di mewzîyê DÎ, yewê ke tede çeka otomatîka girane estbîye, amey îmha kerdene. Boyna vakurê rojhelatî yê şaristanî de hîrêna hêrişê hewayî de di banê DÎ û yew mewzî amey bomba kerdene. Hêrişê teyarayan keştîya DYA û Erebîstanê Seûdî ra yenê.

 20:00: Serekê beledîyaya Kobanê Enwer Muslîmî kî xo kerd çekdar.

19:00: Serdarê Hêzanê Muşterek ê DYA general Martîn Dempsey kanalê xeberan ê BBC de derheqê terorîstanê Dewleta Îslamî (DÎ) û kurdanê Kobanê de vilaweke daye. General Dempsey da zanayene ke hêzê kurdî sey qehremanan danê pêro.

Vilaweka xo de Dempsey nîya qisey kerd: “Teyarayê DYA hêzê terorîst dorme û taxanê teberê Kobanê bomba kenê. Sey netîceyê hêrişanê hewayî tayê wasita û mewzîyê DÎ amey îmha kerdene. Coka terorîstî mecbur bîy ke xo tayê waran ra peyser biancê.” Dempsey ra gore terorîstê DÎ wayîrê teknolojîya moderne û çekanê giranan ê. Rîyê hewayê hêrişî yê koalsîyonê DYA ra, çeteyî taktîkê xo rey-rey vurnenê.

18:00: Xebera BasNewsî ra gore roja çarsemîye temsîlkarê Meclîsê Şarî yê Rojawanî (EGRK) û Cebheyê Kurdanê Sûrîye yê Mîyanneteweyî (ENKS) do Duhok de bêrê têlewe ke duştê terorîstanê DÎ de hêzêde muşterek ronê. BasNews vano ke no derheq de temsîlkarê Partîya Yewîya Kurdanê Rojawanî Newaf Şerîfî qisey kerd û va ke no hêzo ke do bêro awan kerdene, yew hêzo eskerî yo ke terefgirê qet yew partî nîyo û tena wezîfeyê seveknayîşê Rojawanî xo rê keno hedef.

Seba naye hemserekê PYD Selîh Muslîm kî ewro şî Hewlêr.

17:00: Melumatanê ANF û BasNews ra gore, DÎ hêrişê Kobanê bi wasitayanê ke pirrê bombayan ê, kenê. Xeberan ra gore şeş bombayî şaristan de teqay.

Bombayî nuqte û saetanê cîya-cîyayan de amey teqnayene. Yew bomba sûka Şînahî de, yewna leyê camîya Reşadî de, ê bînî kî rojhelat û başûrê rojhelatî yê şaristanî de bîy. Derheqê zerarê bombayan de hîna qet melumat çin o.Heto bîn ra zere û dormeyê Kobanê de pêrodayîşî dewam benê. Henî aseno ke hêzê YPG ewro tenê raver şîy.

Xerîtaya Kobanê û cebheyî. (Çimeyî: Google Maps, ANF, The Institute for Study of War)
Xerîtaya Kobanê û cebheyî. (Çimeyî: Google Maps, ANF, The Institute for Study of War)

16:00: Serekwezîrê Herêma Federal a Kurdîstanî Neçîrvan Barzanî da zanayene ke hêrişê teyara yê DYA û mutefîqan bi koordînasyonê hukmatê Herême yenê kerdene. Barzanî ra gore Herêma Kurdîstanî çek û mermî rusnay Kobanê, labelê mumkin nîyo ke pêşmergeyan uca birusnê. Duştê naye de vatena fermandarê YPG Mehmûd Berxwedanî esta ke Ronahî TV de va ke heta nika Kobanê rê qet çek û mermî nêamey.

Aye ra kî dot Herêma Federal a Kurdîstanî Kobanê ra multecî girewtî. Barzanî ra gore sînorî seba înan rakerde yê.

15:00: Xebara AFP ra gore yew temsîlkarê Tirkîya îdîaya DYA ke êdî besekenê qerargehanê eskerîye yê artêşa Tirkîya seba operasyonanê xo bixebitnê, red kerde. Naye ra gore mabênê DYA  û Tirkîya de peymana newîye çin a. Roja bazarî yew selahîyetdarê DYA vatbî ke Tirkîya heqê xebitnayîşê qerargeha hewayî ya Încîrlîkî da artêşa DYA.

14:00: Goreyê Xebera SOHR ra hêzanê YPG peşewe dest bi hêrişêde girs kerd. Nê hêrişî de di mewzîyî destê DÎ ra girewtî û 13 terorîstî kiştî. Aye ra kî dot teyarayanê DYA û mutefîqanê xo rojhelat û başûrê Kobanê de mewzîyê DÎ bomba kerdî. Mulumatê ANF ra gore bitaybetî cebheyê rojhelatî de qisimê şaristanî ame peyser girewtene. YPG vilaweka xo de da zanayene ke cengê şaristanî de avantajê înan estê: ê şaristan hîna rind zanenê û ser o kî bi taktîkanê gerîla wasitayanê DÎ çin kenê.

13:00: Goreyê ajansê xeberan ê dpa, pêrodayîşanê giranan ra tepîya YPG şewa dişemîye de terorîstê DÎ vakurê rojhelatî û başûrê rojawanî yê şaristanî ra eştî. Çimeyê dpa spîkerê kantonê Kobanê Îdrîs Nasan o.

12:00: Çimeyanê cîya-cîyayan ra gore serê Kobanê de xeylê teyarayî yenê dîyene. Çimeyê ke nêzdîyê YPG yê, vanê ke gerîla bi hêzanê duştê DÎ de hêrişê hewayî koordîne kena. Rêxistina Heqanê Merdiman a Sûrîye (SOHR) vana ke pê teyarayan mewzîyê ke başûrê Kobanê de yê, panc rey amey bomba kerdene. Nê bombardumanî de xeylê terorîstî amey kiştene, malzemeyê eskerîye yê DÎ kî zerar dî. SOHR ra gore hêrişê peyênî yê hewayî tumê Miştenûrî de ca girewt.

11:00: YPG yew vîdeo bar kerd YouTube. Tede cengê şaristanî bi terorîstanê DÎ yeno dîyene.

10:00: Rojnamegerê almanî ke derheqê protestoyanê Kurdîstanê Vakurî de xebere dabî û o semed ra amey tewqîf kerdene, ewro amey raverdayene. Rojnamegerî qereqolê Dîyarbekirî ra vejîyay û seba îfadegirewtiş şonê dozgerîye.

08:00: Melumatanê çapemenîya almane ra gore bi desan tankê artêşa Tirkîya raya sînorî der ê.

03:00: Goreyê melumatê spîkerê YPG Polat Can, yew hêrişê DÎ başûrê Kobanê de sernêkewt. YPG ra gore 100 endamê DÎ amey kiştene, meyîtî destê YPG der ê.

Kronîkê cengê Kobanê heta 6. oktobre. Çime: Deutsche Welle.
Kronîkê cengê Kobanê heta 6. oktobre. Çime: Deutsche Welle.

CEWAB BIDE

Keremê xo ra şîroveyê xo binuse
Keremê xo ra nameyê xo binuse