10. na aşme de serrgêra şehîdkerdişê Vedat Aydinî ya. Vedat Aydin tîya ra 24 serrî verê cû serra 1991î de şehîd bibi.
Dewlete 5. temmuze de eşt keyeyê înan ser. O keye ra girewto û berdo. Badê di rojan 7. aşme de cendegê ey nêzdîyê qezaya Xarpêtî Maden de dîyo.
10. aşme de bi des hezaran kurdî çarnikarê Kurdîstanî ra seba defnkerdişê ey ameyî Dîyarbekir. Bi yew merasîmo gelek gird cenazeyê ey berd “Goristanê Berê Mêrdînî” û uca de defn kerd. Dewlete tehemulê nê wayîrvejîyayîşî nêkerd. Şar badê ke goristanî ra agêra, dewlete bi heme hêzanê xo hêrişê înan kerd. No hêriş de goreyê qeydê fermî 8 însanî şehîd bîyî û bi seyan kesî birîndar bîyî.
A serre Abdulkadîr Aksu wezaretê gureyê zereyî bi. Hayrî Kozakçioglu Dîyarbekir de walî bi. Ramazan Er Dîyarbekir de mudirê asayîşî bi. Mîralay Îsmet Yediyildız qomutanê Alaya Dîyarbekîrî bi. Tayîna mîralayî nê qatlîamî ra dima werizîya Trabzon. Şi Trabzon, uca de merd.
zafê sey nînan sax ê! Ez zana mergê nê însanan ra dima ma do reyna ax û wax bikerê.
Ê serran sey Vedat Aydinî bi seyan kesî bi qaydeyê “faîlê nedîyarî” bîyê vîndî.
Ewro wext wextê vejîyayîşê nê faîlan o.
9. aşma gulane de Kenan Evren merd. Dima zî 17. aşma hezîrane de Suleyman Demîrel merd. Wexto ke nê her di zî merdî, zaf kesan medya de ax û wax kerdo, ke çira bê pers û sual merdê.
Hema Mehmet Agar sax o, Tansu Çiler sax a û zafê sey nînan sax ê! Ez zana mergê nê însanan ra dima ma do reyna ax û wax bikerê.
Weçînayîşê hewtê hezîrane ra dima şertê îdareya Tirkîya vurîyayo. Êdî ma nêeşkenê seba Tirkîya vajê “kirê herî sey verî”! Weçînayîş de hem HDP hem zî CHP propoganda û qalkerdişanê xo de vatêne, “Kesanê ke zerar dayo şarî do hesabê înan bidê!” Dima nê her di partîyan zî zaf rey vatê ke: “Kerdenê kesî, kesî rê do nêmano. No qanûno bingeyî ma rê 12. êlule ra mendo. No qanûn do derhel bêro vurnayîş.” Zafê weçînitoxan zî seba nê sozan ray daye nê her di partîyan.
Diwêsê êlule ra dima heme şarê Tirkîya zulm dî la înanê ke hîna zaf zulm dîyo, kurd ê. Hende dewî socîyê, hende daristanî socîyê, heme zî yê kurdan bî! Hende welatperwer û sîyasetmedaran îşkence dî, hende însanî şehîd bîyî. Se ra neway û new ê înan kurdî bîyî. Diwêsê êlule ra dima hema-hema nêmeyê Kurdîstanî bi veng. Şaro kurd “Terkî Vatan” bi. Welatê xo, wela xo caverda û koç kerd, da ra ro rojawanê Tirkîya şi.
hende însanî şehîd bîyî. Se ra neway û new ê înan kurdî bîyî.
Gelo merdim bi xebatêka biorganîze dest bierzo nê gureyan, merdim do nêeşko heq ra vejîyo!?
Ewro merdim ewnîyeno parlamento ra, derheqê demokrasî ra, derheqê heq û huqûqî ra, derheqê heqê merdiman ra, derheqê heqê cinî û gedeyan ra ûsn… merdimî rê yew hêvî û omid virazîyeno.
Nika parlamento de 132 mebusê CHP û 80 mebusê HDP estî. Hûmara mebusanê nê her di partîyan kena 212 mebusî. Eke mucadeleyê demokrasî de nê her di partî dest bidê yewbînî, fekê xo bikê yew û zerrî ra hewl bidê xo, eşkenê zaf çî virazê. Eşkenê heqê zaf çîyan ra vejîyê!
Nika sibo roj serrgêra 24. de Vedat Aydin do bêro yadkerdiş. Ma do pêro pîya naletan bivarnê nê qatîlan ser. Ma do şêrê qebra ey ser ma do ax û wax bikerê. La nê verkewtişî ra û ax û waxî ra tu netîceyêk do nêvejîyo. Eke nê her di partî bikoyê vernîya şarî û sey konjokturê weçînayîşî ajîtasîyon û propoganda bikerê, ez vana her çî ra ver do qatîlê Vedat Aydinî û qatîlê şehîdanê bînan do vejîyê meydan. No hêz o ke ha yo parlamento de do qatîlê bombakerdişê Roboskî zî vejo!
Ez bi nê hêvîyan mucadeleyê embaz Vedat Aydinî ver sejde bena. Mi qet o xo vîr ra nêkerdo û ezo tu wext ey xo vîr ra nêkerî.
