Henî aseno ke krîzê sîyasetî yê parlamentoyê Herêma Kurdîstanî derheqê meseleya serekîye de beno hîna giran. Gerek ewro parlamento de derheqê îstîqbalê serekîya Kurdîstanê Başûrî de kombîyayîş bivirazîyo, la 111 parlamenteranê Herêma Federal a Kurdîstanî ra tena 57 teneyî beşdarê meclîsî bîyî.
Pêro 38 parlamenterê PDK û 19 parlamenterê eqalîyetan kombîyayîşê parlamentoyî boykot kerd. Kombîyayîş de kî DYA, Îran, Tirkîya, Misir, Almanya û Miletanê Yewbîyeyayan ra temsîlkarî ameyî parlamentoyî ke tey beşdar bibê.
Gorran û YNK wazenê ke serek bi raya parlamentoyî bêro weçînitene
Partîyanê Gorran û YNK tesewurê qanûnî dabî ke sîstemê Herêma Kurdîstanî vurneno keno sîstemê parlamenterî. Ney ra gore sîstemê serekîye yeno vurnayene û parlamento hîna zaf îqtîdar cêno. Demê serekî yê Mesûd Barzanî 19. tebaxe reseno peynîye. No semed ra partîyan mîyan de werênayîşî qewimîyabîyî. Partîyê ke dest danê nê tesewurî YNK, Gorran, Partîya Komunîst a Kurdîstanî, Yewîya Îslamî ya Kurdîstanî (Yekgirtû) û Komelê Îslamî yê Kurdîstanî (Komal) yê. Nê partîyî wazenê ke qanûno ke nika esto, parlamento de bêro sererast kerdene û nîya serekê Herêma Kurdîstanî bi raya şarî ney, wa hetê parlamentoyî ra bêro weçînitene.
Pêro pîya 56 parlamenterî beşdarê kombîyayîşê ewroyî bîyî. Zafêrîya meclîsî 57 parlamenteran ra peyda bena. Bitaybetî hetê parlamenteranê PDK ra rexne ame ke temsîlkarêde Îranî parlamento de ca cêno. PDK ra gore planê vurnayîşê sîstemê serekîye planê rejîmê Îranî yo. Vilaweka PDK de ame vatene ke her mesela neteweyî gerek goreyê werêameyîşêde muşterek bêro hel kerdene, pê raykerdiş ney.
PDK ra gore seba çareserkerdişê nê mewzûyî hîrê rayî estê:
- Serekê Herêma Kurdîstanî bi raya qanûnê nikayinî yê parlamentoyî bêro weçînitene û no qanûn nêno vurnayene. Qanûnê nikayinî ra gore serekê Herême hetê şarî ra yeno weçînitene.
- Nika Qanûno Bingeyî yê Kurdîstanî yeno nuştene. Qanûno newe de na mesele do dîyar bo.
- Bi raya werêameyîşî pêro hetê sîyasîyî na mesele muşterek hel kenê, çike hukmatê Herêma Kurdîstanî kî hetê PDK ra nîya ame pêra.
