Fîyatberzîya emlakan ra dime nika krîzê banka û ekonomîya Spanya bena girane. Hewteyo verên de bextê Spanya qet nêgurîya. Futbol de vera Swîs hewno çetin dî: bi (ebe) 1:0 kot bin. Rojnameyê girsî Soanya nuşto: “fîyaskoyo milî”.

Futbol ra qeder ekonomî kî zaf xirabin sona. Pisporê ekonomî ra gore çêberan (keyberan) pey de Spanya bi Almanya û Fransa deynanê neweyan ser o qisey kena, çike bankayê Spanya deynê xo ke bankayanê fransiz û almanan ra estê, besenêkene ke înan peyser bidê. Pisporan ra gore Yunanîstano dîyin ewro Spanya ya.

Des serran ra ekonomîya Spanya her serre bîye girse û misalêde rindek bî. Her serre Spanya de 600.000 kesan kar dî, her ca de banê (bonê) neweyî amey viraştene û her ca de fîyate dayîreyan zêdîyay, bîy di qat, hîrê qat ya kî çar qat. Her çi heta hamnano peyên rind şîyêne. Hama çîyê xelet bî. Bi pereyê Euroyî ra şarê (sarê) Spanya bi faîzê zaf nizmî kredî girewto.  Bi nê kredîyan ra banî viraştî, pawlukayî fînanse kerdî. Na xebere nika henî weşe nêasena, na xebere no tew şarê Spanya rê derd o, çike nika faîzî bîy berzî û deyndarî besenêkenê ke deynê xo biderê.

Bi krîzê emlakan ê Amerîka ra fîyate banan ê spanyolan her aşme tenêna ame war. Ekonomî nika rijîyaya, bêkarîye rest 20 %. Cêncê ke çewres serre ra qij ê, parê înan ê bêkarîye 40 % o. Wexto tarî yê Spanya maneno ro yê DYA: bi kredîyanê erjanan xeylê kesan kredîyê seba banê xo girewt, her ca de emlak û dayîre herinay ya kî da viraştene. Teyna (tena) spanyolan ney, xeylê amerîkayijan û înglizan kî Spanya de bi kredî banî herinay. Sireyo ke fîyatê banan bîy berzî û faîzê kredî nizm mendê, no kay rind ame kaykerdene. Badê ke faîzî bîy berz û fîyatê banan bîy nêm, no  kayo rindek çarîya ra hewno xirabin.

Teyna serra 2007 de bankayanê Spanya besenêkerd ke 40 mîlyar yê deynê xoyê xeripîyayî peyser bicêrê. No proses 2009 û 2010 de sey serra 2007î bî. Nika bankayanê hêremanê  Spanya de pereyî nêmendê. Pereyo ke înan de bî,  ê serran ra sey deyn dayo kesî. Nika nêsîkînê ke no deyn tahsil bikerê. Banan îcar kenê cênê, la besenêkene birosê. Dewleta Spanya lebitîyêna ke nê bankayî îflas mekerê. Problemê Spanya înan de kî o yo ke henî zaf dewletîya lîkîte çin a. No semed ra problemê Spanya game bi game beno problemêde giran ê pêro Ewropa. Spanya daha muhîm a seba Ewropa, çike bankayê Fransa 70 mîlyar Dollarî deyn dayê Yunanîstan, hama bankayê Spanya rê 200 mîlyar deyn dayo ci. Bankayanê Almanya kî 250 mîlyan Dollarî kerdî da bankayanê Spanya.

Çîyêde rind o yo ke ekonomîya Spanya yê Yunanîstanî ra daha rind o. Nika pêro spanyolî îman kenê ke nêzdî de krîzê ekonomî yê înan qedîno û ekîbê înan ê futbolî kupa qezenc bikero.

CEWAB BIDE

Keremê xo ra şîroveyê xo binuse
Keremê xo ra nameyê xo binuse