Goreyê yew analîzê Wezirîya Weşî ya Tirkîya ra, mabênê 294 awanê çimeyan de ke seba şimitiş roşînê, Awa Mizurî awa tewr weş a.
Awa Mizurî hetê şîrketê pulurijî Munzur Suyî ra roşîna. Şîrket serra 2004 de hetê 242 nêmedaran ra Çimeyanê Mizurî de ame ronayene. Melumatan ra gore şîrketo tek o ke Dêrsim de îxracat keno. Ewro Munzur Su rojane 160 tonî awe vejeno û 47 kesan rê kar dano.
Endamê heyetê îdareyî yê Munzur Suyî Mehmet Alî Saylî da zanayene ke şîrketê xo Dêrsim de şîrketo tek o ke îxracat û îdxalat keno. “Ma Almanya û Hollanda rê îxracat kenîme. Erebîstan ra kî waştiş ame. Ma nika seba naye hazirîya xo kenîme. Labelê semedê viraştişê cografyaya ma ra ma derheqê neqlîyet û resayîşî de zehmetîye ancenîme.”
Endamo bîn ê heyetê îdareyî, Fevzî Ozerî, kî va ke ê seba weçînîyayîşê awa tewr weşe, zaf bîyê keyweş. “Awa Mizurî hetê kalîteyê awe ra awa çimeyan de cayo yewin der a. No analîzan de tespit bîyo. (…) PHyê awa ma 8,45 ya. Awê çimeyan ê bînî ke Tirkîya de roşînê, mabênê 7 û 8 der ê. Awa ma rastikên bê qilêrê endustrî, kîmyewî yan kî bîyolojî ya. Ma awe Çimeyanê Mizurî ra bê vurnayîş amabalaj kenîme rusnenîme. Her kes bi rehetîye besekeno awa ma biwero.”
