Xebera DÎHA ra gore, artêşa tirke Dêrsim, Çewlîg û Şirnex de bi hetkarîya hewayî operasyonê eskerî viraştî.

Operasyonî Dêrsim dewa Pilemurîye Pîrê Xanike de 6. temmuze ra bi nat dewam benê. Şirnex de Koyê Cûdî û qezayê Silopîye de bi beşdarîya qorîcîyan operasyonan dest kerd ci. Çewlîg de kî Gelîya Kelxaçî yê Kêxî de hereketê eskeran esto.

Operasyonî tim bi ardimê hewayî ra yenê ramitene. Sebebê operasyonan zelal nîyo. Heta nika qet melumat çin o eke ê waran de pêrodayîş esto yan çin o. Bitaybetî Pilemurîye de erazîyî bi helîkopteranê kobrayî yenê bomba kerdene, coka zafê cayan de birrî veşenê. Tayê cayan de amey dîyene ke tîmê taybetî hewa ra amey war ardene.

Heto bîn ra, hetê Erzinganî de xeylê wasitayê eskeran amey dîyene ke qaşo duştê gerîlayanê HPG de yenê xebitnayene.