Komela Armenîyanê Dêrsimî (KAD) ke newe-newe ame saz kerdene, Îstanbul de ju (yew) restorant de şamî daye.
A şewe de serekê KAD Mîhran Prgîc Gultekîn qiseykerdişê xo de armenîyan ra waşt ke ê kulturê xo rê wayîr bivejîyê, çike no şerefêde berz o. Na şewe de serekê beledîyaya Pulurî Mustafa Sarigul, nuştoxo dêrsimij Ahmet Cîhan, sereka weqfa Hrant Dînkî Rakel Dînk kî cayê xo girewt.
Gultekînî nîya qisey kerd: “Jenosîdê 1915 de dêrsimijan armenîyî seveknay. No jenosîd ra tepîya armenîyê ke uca (uza) mendê, ters ra name û îtîqadê xo vurna. Nameyê tirkî girewtê û îtîqadê Dêrsimî û raya pîrî girewte. Labelê qirkerdişo dîyin kî birayanê xo yê dêrsimijan ra pîya 1938 de ancîya (onca) dîye. Belkî heqê kalikanê ma bîbî ke înan nasnameyê xo vurna. Labelê ma êndî ewro weşîya xo bi armenîkî ramenîme, verê raya ma de qet çî çin o. Ez tornê Bogosî ya, armenî ya û jê (sey) armenî wazena ke weşîya xo biramîne.”
Mîhran Prgîc ra tepîya sira Rakel Dînk girewte. Dînk va ke “Qiseyê mêrdeyê mi noca (naza) de ame mi vîr. Ey vatêne ke ‘Ez ê kesan ser o ke hîna weş ê, wazens qisey bikerîne.’ Bi Sabîha Gokçen dest kerdo ci û xeylê rexneyî girewtîbî. Peynîye şima rind zanenê. Kitabo Pîroz de yeno nuştene ke raya rasta rinde teng a, telî û dejan ra pirr a. Karo ke ewro Mîhran keno, asan nîyo, ey rê vana canê xo weş bo.”
Qiseykerdoxan ra dime deyîrbaza dêrsimije Aygul Toprak kilamanê Dêrsimî ra konserê viraşt.
