Şîrketê cigêrayîşî KONDA derheqê weçînitişê parlamentoyê Tirkîya yê 7. hezîrane de rapor weşana. Nê raporî ra gore ame dîyene ke zafêrîya rayanê HDP ê weçînitoxanê CHP ra ney, wa yê weçînitoxanê AKP ra ameyî.
Rapor ra gore îddîaya ke HDP bi “rayanê emanetî” yê CHP baraj vêrda ra, bêbinge yê. Rapor de nusîno ke “Goreyê netîceyê cigêrayîşê ma, qisimêde girs ê rayanê neweyan ê HDP weçînitoxan ra ke verê cû ray dabî AKP, înan ra yeno.” Rayê ke CHP HDP rê kerdî vîndî, di qatê ci kî MHP rê kerdî vîndî. Rayê ke AKP ra şîyî kî semedê weçînitoxanê neweyan ra yê.
Zafêrîya Rayanê HDP Kurdîstan ra ameye
Yewna netîceyê analîze KONDA o yo ke nufus û naye ra hûmara weçînitoxan bîya berze. Duştê naye de hûmara weçînitoxanê CHP hema-hema eynî menda. No sebeb ra kî CHP sey netîce zaf weçînitoxî vîndî nêkerdî, la neweyî kî nêgirewtî. Henî aseno ke weçînitoxanê muhafazakaranê ke verê cû raya xo dabîye AKP, Tirkîya de raya xo daya MHP, Kurdîstan de kî daya HDP. Bitaybetî metropolan de AKP xeylê rayî dayî HDP. KONDA ra gore partîya ke surprîzo tewr girs ardo meydan, bêguman HDP bîye. Sebebo bingeyên ê vîyarnayîşê barajî qeraro ke sey partîye bikewo weçînitiş, bîyo. HDP zafêrîya rayanê xo, %47,5, Kurdîstanê Vakurî ra girewte. %17,6 Îstanbul ra ameyî û %9,4 Deryaya Sipîye ra ameyî, ê bînî cayanê cîya-cîyayan û teberê welatî ra. Bitaybetî Kurdîstan de par û weçînitişê 2011 ra gore hûmara weçînitoxan bîya zêdîye. KONDA ra gore %72 ê weçînitoxê HDP eslê kurdî ra yê.
AKP ra %11, CHP ra %0,4 şîyê HDP
Pêro pîya, AKP par ra gore %11 weçînitoxê xo kerdî vîndî. CHP %10 weçînitoxî kerdî vîndî, MHP %8 girewtî. HDP de na rêje %133 ya. Serra 2014 de 2.746.000 rayî ameyî dayene, emser hûmara rayan bîya 5.838.000. Yanî, bi vateyêde bîn, nîsbetê weçînitoxan bi %213 vejîya bîye di qatî. Weçînitoxanê AKP ra %8,49 emser raya xo daye HDP. Nê pêro pîya 1,8 mîlyonî ray ê. Eynî hûmare AKP ra şîye bi MHP. Rayê ke CHP HDP rê kerdî vîndî, %0,4 ê. Labelê di qatê ci CHP ra şîyî bi MHP.
Raporê KONDA (bi tirkî) tîya yeno wendene.
