Xebera keyepelê Zazakî.net ra gore hetê Alî Aydin Çîçekî ra kitabêde hîkayeyan bi (ebe) sernameyê “Teberik”î vejîya pîyase. Kitab de 11 hîkayeyî bi nameyanê “Teberik, Gijgêleke, Xêx, Xortê Dewe, Mîyazê Xizirî, Xatir, Toraqo Solin, Mar, Şîlane û Gulsosine, Berîvane, Gule” estê. Mewzûyê hîkayeyan zafane heyatê dewe û dewijan o. Kitab hetê Weşanxaneyê Vateyî ra ame çap kerdene û aye ra beno kitabo 10. yê hîkayeyanê kirmanckî.
Alî Aydin Çîçek serra 1984 de Gimgim de ameyo dinya û nika Îstanbul de ciwîno. Raver ra dersa kirmanckî girewte, tepîya bi xo derse daye û nika hîkaye û şîîran nuseno. Emser xelata juyin (yewin) a Musabeqaya Şîîran a Huseyîn Çelebî bi şîîrê xo “Xatir” girewte.
Kunyeya kitabî: Alî Aydin Çîçek, Teberik, Weşanxaneyê Vateyî, Îstanbul, 2010, 95 rîpelî
Adresa waştişî: Vate Yayınları, Katip Mustafa Çelebi Mahallesi, Tel Sok. No: 18 Kat: 3, Beyoglu – Îstanbul, Tel: 0 212 244 94 14, e-maîl: wesanxaneyevateyi@hotmail.com
Dîyarbekir de: Ekinciler Cad., Nurlar Ap., Kat 3, Ofîs – Dîyarbekir
