Rojnamegerê rojnameyê tirkî “Taraf” Ahmet Altanî nuşteyê xoyo peyên de zîyaretê serekwezîrê Tirkîya Tayyîp Erdoganî Kurdîstanê Başûrî ser o vindet. Altanî ra gore Tirkîya karanê teberî de cîya û karanê zereyî de cîya polîtîka kena.
Kurdîstanê Başûrî de Erdoganî ju (yew) meydanê teyara kerd ra, raver ra no ca ser o “Xeyr amey Kurdîstan” nusîyaybî. Erdoganî uca (uza) qalê rakerdişê meydanê teyara, têkilîya kurdanê başûrî û Tirkîya û ekonomî kerd. Altanî ra gore çekuya Kurdîstanî seba Erdoganî Kurdîstanê Başûrî de problem nîyo, labelê Tirkîya de besenêkeno Kurdîstan ra vajo Kurdîstan, vano Vakurê Rojehelatî.
Nuşteyê Ahmet Altanî ra parçeyek: “Bi serran ma çekuya ‘kurd’ qedexe kerde, Kurdîstan qedexe kerd. Wextê kî henî xo werd, qiseykerdişê kurdkî qedexe kerd.
Ma se bî nika?
Ewro serekwezîrê Komara Tirkîya meydanê teyara ke ser o ‘Şima Xeyr Amey Kurdîstan’ yeno nuştene, keno ra, viraştoxê meydanê teyara rê sipas keno (…). Ma hemwelatîyanê kurdan ê Kurdîstanî jê (sey) ‘dost û bira’ zerrî ra selam kenîme, la o hîna besenêkeno ke mintiqaya welatê xo ra vajo ‘Kurdîstan’, na çekuye hîna no welat de red keno, terseno ke na çekuye no welat parçe bikero û ma besenêkenîme ke hemwelatîyanê xo yê ‘vakurê rojhelatî’ de bêrîme pê.
Çi ke destebera ma ame, ma kerd ke virênîye ro ronayîşê Kurdîstanî bicêrîme. Ma nêşikîya û axir Kurdîstan ame ronayene. (…)
Nika ma Kurdîstanê Îraqî ney, labelê, seba ke ma henî musay, kurdanê xo ra tersenîme. Semedê nê tersî ra na dewlete heqanê hemwelatîyanê xo yê kurdan qebul nêkena.Heyatê di zonan (ziwanan) red kena, înan rê heqê perwerdeyê ‘zonê (ziwanê) dayîke’ nêdana, seba ke Kurdîstanê hezar serran ra nêşikîno vajo Kurdîstan, ci ra vana ‘vakurê rojhelatî’.
Şima do bivînê, panc (ponc)-des serran ra tepîya ‘Kurdîstanê ma’ de rakerdişê meydanê teyara bi di zonan (ziwanan) bêro kerdene, kî nuşteyê ‘Şima Xeyr Amey Kurdîstan’, hem tirkî û hem kurdkî de bêro darde kerdene.”
