Bîlançoyê tewqîfkerdeyanê operasyonanê sîyasîyan ê dewleta Tirkîya duştê sîyasetkar, aktîvîstê heqanê merdiman (mordeman) û rojnamegeran de beno zêde. Roja 4. êlule ra heta ewro Îstanbul de dorê 100 kesî amey pêgirewtene. Tena perey mabênê 24 saetan de 86 BDPijî amey pêgirewtene. Nînan tede kî parlamenter, serekê qeza û şaristanan.
Goreyê melumatê ke ardimkerdoxa hemserekî ya BDP Meral Daniş Beştaş day, 14. nîsane 2009 ra bi nat, yanî nê di serranê peyênan de “operasyonê KCK” de 7.748 kesî binê nezaretî de bîyê, 3.895 kî amey pêgirewtene. Bîlançoyê şeş aşmanê peyênan kî nîya r’ o: 4.148 kesî binê nezaretî de, 548 kesî kî tewqîfkerde. Beştaş rojnameyê tirkî Taraf rê da zanayene ke “Nê reqemî semedê dewrê derba eskerîye ra nênê, la aîdê derba hukmatî yê. (…) Demokrasî ver a yeno waştene ke no welat biçarnê hepisxane”
Pêgirewtişan ra teber kî xeylê bananê (bonanê) BDP de dizdî ya cîhazê goşdaritişî amey girê dayene.
